Category: Без рубрики (Page 6 of 309)

Жетісуда Президент Жолдауындағы міндеттер мен өңірдің өзекті мәселелері талқыланды

Мемлекет басшысының Қазақстан халқына Жолдауында белгіленген міндеттерді түсіндіру және өңірдің өзекті мәселелерін талқылау мақсатында Құрылтай мен Үкімет өкілдері облысқа жұмыс сапарымен келді. Талдықорған қаласындағы Достық үйінде және «Атамекен» кәсіпкерлер палатасында өткен кездесулерге депутат Екатерина Смолякова, Қазақстан Халық Кеңесінің өкілі Қайрат Кереев, Ауыл шаруашылығы вице-министрі Назгүл Хатепова, Қаржы вице-министрі Дәурен Темірбеков, қоғамдық ұйымдар мен іскер әйелдер қауымдастығының өкілдері қатысты.

Алғашқы кездесу Достық үйінде өтіп, онда әлеуметтік инфрақұрылымды жаңғырту, ауыл шаруашылығын дамыту және тұрғындарды толғандырған мәселелер талқыланды. Құрылтай депутаты Екатерина Смолякова Жалпыұлттық құрылыс жылын тек жаңа ғимараттар салумен шектемей, әлеуметтік инфрақұрылымды жаңғыртуға бағыттау қажеттігін атап өтті.

Келесі кездесу «Атамекен» кәсіпкерлер палатасында іскер әйелдердің қатысуымен өткізілді. Онда әйелдер кәсіпкерлігін дамыту, мемлекеттік сатып алу жүйесін жетілдіру, жеңілдетілген несиеге қолжетімділікті арттыру және әлеуметтік кәсіпкерлікті қолдау мәселелері талқыланды.

Жұмыс сапары аясындағы тағы бір маңызды басқосу паралимпиадашылармен өтті. Кездесу барысында Құрылтай депутаты Екатерина Смолякова инклюзивті қоғам қалыптастыру мәселесіне тоқталды. Қазіргі таңда елімізде ерекше қолдауды қажет ететін 240 мыңға жуық бала бар. Оларға медициналық, психологиялық-педагогикалық және оңалту көмегін уақтылы көрсетілуінің маңызы үлкен. Осы бағытта балаларды кешенді қолдау жөніндегі заң жобасы әзірленуде. Сонымен қатар ерте диагностика жүйесін жетілдіру, қажетті қызметтерді цифрлық форматта қолжетімді ету және ымдау тілі мамандарының тапшылығын азайту мәселелері көтерілді.

Қаржы вице-министрі Дәурен Темірбеков паралимпиадалық спортты дамытуға мемлекеттік қолдау жалғасатынын жеткізді. Атап айтқанда, спортшыларды халықаралық жарыстарға даярлау, қажетті құрал-жабдықтармен қамтамасыз ету, жүлдегерлерді ынталандыру және оларды сүйемелдеушілердің шығындарын өтеу қарастырылған.

Талдықорғандағы Тіл сарайында облыстық Қоғамдық кеңес мүшелерімен кездесу өтті. Жиында Мемлекет басшысының Жолдауында айтылған міндеттер, аймақтың әлеуметтік-экономикалық дамуы және халықтың тұрмыс сапасын арттыру мәселелері сөз болды.

Осыдан кейін ҚР Құрылтайының депутаты Наурыз Сайлаубай мен ҚР Халық кеңесінің мүшесі Руфина Усанова Талдықорған қаласындағы «Қайнар АКБ» жауапкершілігі шектеулі серіктестігінің ұжымымен кездесті. Кәсіпорынның мәжіліс залында өткен іс-шараға 100 адам қатысты. Қонақтар зауытты аралап, оның қызметімен танысты.

Келесі кезекте қонақтар Талдықорған қаласындағы Белсенді ұзақ өмір сүру орталығында аға буын өкілдерімен жүздесті. Кездесуде қарттарды әлеуметтік қолдау, олардың тұрмыс сапасын жақсарту және қоғам өміріне белсенді қатысуына жағдай жасауға байланысты түскен ұсыныстарды тыңдап, нақты жауаптар берілді.

Осыдан кейін халық қалаулылары І. Жансүгіров атындағы Жетісу университетінің ұжымымен кездесті. Онда жоғары білім беру жүйесін дамыту, мамандарды даярлау сапасын арттыру, өңірдің кадрлық әлеуетін нығайту және университеттің облыстың әлеуметтік-экономикалық дамуындағы рөлі талқыланды. Сондай-ақ оқу орнының білім беру және ғылыми әлеуеті, жұмыс берушілермен байланысы мен алдағы даму бағыттары сөз болды.

Сапар соңында Құрылтай мен Үкімет өкілдері Көксу және Ескелді аудандарына барып, тұрғындармен кездесті.

https://www.gov.kz/org/zhetysu-comdev/press/news/details/1323824?lang=kk

Құрылтай депутаттары Қарағанды облысының тұрғындарына Президент Жолдауының басым бағыттарын түсіндірді

Қарағанды облысында Мемлекет басшысының «Жаңа тарихи кезеңдегі Қазақстанның өзекті міндеттері» атты Жолдауын жүзеге асыруға бағытталған нақты шаралар айқындалады. Құжаттың негізгі басымдықтарын түсіндіріп, оны іске асыру жолдарын талқылау үшін өңірге Құрылтай депутаттары Асхат Аймағамбетов, Вадим Басин, Үнзила Шапақ, Александр Данилов және Айсұлу Сүлейменова келді. Олар облыс тұрғындарымен, соның ішінде өндіріс жұмысшыларымен және жастармен кездесіп жатыр.

Депутаттардың өңірге жұмыс сапары облыс активімен кездесуден басталды. Жиынға Қазақстан Халық Кеңесінің мүшелері мен орталық мемлекеттік органдардың өкілдері де қатысты. Кездесуде Мемлекет басшысының тапсырмаларын орындау мәселелері талқыланып, Қарағанды индустриялық өңірінің дамуына тікелей қатысты басым бағыттарға айрықша назар аударылды. Атап айтқанда, өнеркәсіпті жаңғырту, энергетика мен инфрақұрылымды дамыту, инвестиция тарту, цифрлық технологияларды енгізу және тұрғындардың өмір сүру сапасын жақсарту мәселелері қаралды.

Құрылтайдың Әлеуметтік-мәдени даму комитетінің төрағасы Асхат Аймағамбетов әлеуметтік саясатты жаңарту және көмекке мұқтаж азаматтарды атаулы қолдау мәселелеріне тоқталды.

– Бұл – жаңа Конституция қабылданғаннан кейінгі Мемлекет басшысының алғашқы Жолдауы. Құжаттың басты ерекшелігі – әр адам өзіне тікелей қатысты маңызды мәселелердің жауабын таба алады. Мәселен, мұғалім үшін өз құқығының қорғалуы, педагогтерге түсетін артық жүктеменің азайтылуы маңызды болса, дәрігерлер еңбекақының өсуі мен медицина саласының дамуына назар аударады. Ал кәсіпкерлер үшін жаңа мүмкіндіктер, мемлекеттік басқару мен салық жүйесіндегі өзгерістер маңызды. Құрылтай Президент Жолдауын жүзеге асыруға бағытталған бірнеше заң жобасын әзірлеп қойды, – деді депутат.

Жиында «Халықтық құрылыс» бастамасы да жеке талқыланды. Оны жүзеге асыру үшін 2029 жылдың соңына дейін шамамен 6,5 трлн теңге бағыттау жоспарланып отыр. Бұл жергілікті кәсіпорындардың әлеуетін арттырып, өңірде жаңа жұмыс орындарын ашуға мүмкіндік береді.

Айсұлу Сүлейменованың айтуынша, депутаттар тұрғындармен кездесуде жастарға да ерекше назар аудармақ. Оларға белсенділік танытып, алдына нақты мақсат қоя білу, сапалы білім алу қажеттігін жеткізуді көздейді. Өйткені елдің өркендеуіне әр азаматтың қосқан үлесі маңызды.

Кездесуде айтылған ұсыныстар Жолдауды жүзеге асыру жөніндегі облыстық бірыңғай жоспарға енгізіледі. Облыс әкімі Ермағанбет Бөлекпаев әр міндеттің орындалу мерзімі мен нәтижесіне жауапты тұлғалар нақты көрсетілген жоспар әзірлеуді тапсырды.

Басым міндеттердің қатарында жаңа өндіріс орындарын іске қосу, инвестиция тарту, экономика мен ауыл шаруашылығын цифрландыру, жасанды интеллект технологияларын енгізу және елді мекендерді абаттандыру бар. Сонымен қатар Қарағанды, Теміртау және Балқаш қалаларының цифрлық егіздерін жасап, әрқайсысын дамытудың нақты жоспарларын әзірлеу міндеті қойылды.

– Жұмысымыздың басты өлшемі өткізілген жиындар мен әзірленген құжаттардың саны емес, ел өміріндегі нақты өзгерістер болуы керек. Бұл – тұрақты жұмыс істейтін кәсіпорындар, сенімді инфрақұрылым, сапалы жұмыс орындары және халыққа қолжетімді қызметтер, – деп атап өтті өңір басшысы.

Бүгін Құрылтай депутаттары Қарағандыдағы кәсіпорындар мен жоғары оқу орындарын аралап, Теміртау және Саран қалаларына да барады.

https://www.gov.kz/org/karaganda/press/news/details/1323575?lang=kk

Мемлекет басшысы Network School негізін қалаушы Баладжи Шринивасанмен кездесті.

Кездесуде Қазақстанның технологиялық экожүйесін дамыту, цифрлық құзыреттерді арттыру, адам капиталын дамыту және инновациялық жобаларды қолдау мәселелері талқыланды.

Қасым-Жомарт Тоқаев Network School Kazakhstan жобасының іске қосылуын құптап, оның отандық жоғары оқу орындарымен, стартаптармен және технологиялық кәсіпорындармен ынтымақтастығын кеңейтудің маңызын атап өтті.
https://t.me/aqorda_resmi/36913

Бота Елеусізова: Қазақстан жерасты суларының небәрі 3,5 пайызын пайдаланып отыр

«Әділет» партиясы фракциясының мүшесі Бота Елеусізованың Премьер-министрдің орынбасары Қанат Бозымбаевқа жерасты су ресурстарын тиімді пайдалану және қорғау мәселелері туралы жолдаған депутаттық сауалы.

Айдос Сарым: Президент Жолдауы ел тарихының сапалы кезеңіне жол ашады
 
Құрылтай депутаты Айдос Сарым Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын іске асыру бойынша үндеу жасады. Ол құжатта қамтылған маңызды бастамалар мен нақты мақсат-міндеттер қоғам тарапынан үлкен қолдау тапқанын атап өтті.

– Мемлекет басшысының биылғы Жолдауы – жаңа жоспарларымыз бен іс-қимылымыздың доктринасы. Жолдауда алдымызға тарихи міндет қойылып отыр. Ол – бүкіл экономикалық капиталды инфрақұрылымды түбегейлі жаңартуға, әлеуметтік саланы сапалы дамытуға және қазақстандықтардың тұрмыс деңгейін көтеруге жұмылдыру. Игі бастаманың өзегінде адам мен оның құқығы, қадір-қасиеті және ертеңгі күнге деген сенімі тұр, – деді депутат.

Сөзін қорытындылай келе, Айдос Сарым Құрылтай Президент айқындаған ұлттық жаңғыру бағдарламасын толық қолдайтынын, оны заңнамалық тұрғыда ілгерілетуге бар күш-жігерін жұмсайтынын айтты. Ол осындай тарихи сәтте әр азаматты, тұтас қоғамды мемлекетіміздің өркендеуі үшін бірігуге, игі істерге тізе қосуға шақырды.

Құрылтай Төрағасы Айбек Дәдебай бұл үндеу барлық фракция депутаттарының ортақ ұстанымы екенін айтып, әріптестерін Президент бағдарын қолдауға шақырды.

Жетісу облысында Мемлекет басшысының жаңа Жолдауында айқындалған стратегиялық міндеттер талқыланды

Жаңа әлеуметтік нысандар салу, шаруаларға қолжетімді несие беру және кәсіпкерлікті қолдау мәселелері Талдықорған қаласындағы Достық үйінде өткен кездесудің негізгі тақырыптарына айналды. Мемлекет басшысының «Жаңа тарихи кезеңдегі Қазақстанның өзекті міндеттері» атты Жолдауын іске асыруға арналған бұл жиында депутаттық корпус пен Үкімет өкілдері Жетісу облысының жұртшылығымен кездесіп, жоспарланған шараларды түсіндіріп, тұрғындардың ұсыныс-пікірлерін тыңдады.

Кездесуге Қазақстан Республикасы Құрылтайының депутаты Екатерина Смолякова, Қазақстан Халық Кеңесінің мүшесі Қайрат Кереев, Ауыл шаруашылығы вице-министрі Назгүл Хатепова және Қаржы вице-министрі Дәурен Темірбеков қатысты. Басқосуға өңірдегі этномәдени бірлестіктер мен қоғамдық ұйымдардың өкілдері де жиналды.

Жиында Жолдауда айқындалған міндеттердің іс жүзіндегі маңызына, атап айтқанда, инфрақұрылымды дамыту, отандық өндірісті қолдау және халықтың өмір сүру сапасын арттыру мәселелеріне ерекше назар аударылды.

Екатерина Смолякова жарияланған Жалпыұлттық құрылыс жылы тек жаңа ғимараттар салумен шектелмейтінін, инфрақұрылымды жаңғыртуды және халыққа қажетті әлеуметтік нысандарды салуды қамтитынын атап өтті.

– Өңірлерге жасаған сапарлар барысында біз бұл қажеттіліктерді өз көзімізбен көріп, тұрғындардың өз аузынан естіп жүрміз. Кейбір жерлерде ерекше қажеттігі бар балаларға арналған оңалту және түзету орталықтары қажет болса, енді бір елді мекендерде балалардың спортпен шұғылдануына жағдай жасалмаған. Сондықтан әрбір жаңа нысанның артында нақты мақсат тұруы тиіс. Яғни қажетті көмектің қолжетімділігін арттыруға, балалардың жан-жақты дамуына мүмкіндік жасауға және халықтың күнделікті өмір сүру сапасын жақсартуға бағытталады, – деді депутат.

Сондай-ақ депутат Жетісу облысындағы туристік инфрақұрылымды дамыту мәселелеріне тоқталды. Оның айтуынша, парапланеризм алаңына апаратын жолға қатысты өтініштерден кейін айналма жол салу туралы шешім қабылданған. Бұдан бөлек, Алакөл маңындағы Жетісу мен Абай облыстарын байланыстыратын жолдың проблемалық учаскесіне қатысты тиісті жұмыстар жүргізілуде.

Кездесудің маңызды бөлігі ауыл шаруашылығын дамытуға арналды. Ауыл шаруашылығы вице-министрі Назгүл Хатепова өткен жылы өсімдік шаруашылығын жеңілдетілген қаржыландыруға бір триллион теңге бөлінгенін жеткізді. Бұл қолдау шаруаларға егіс және егін жинау науқандарына дайындалуға, қажетті материалдар сатып алуға, техниканы жаңартуға мүмкіндік береді.

– Ендігі міндет – ауыл шаруашылығы тауарын өндірушілерге инвестициялық мақсаттарға арналған ұзақ мерзімді қаржыландырудың қолжетімділігі. Бұл ретте нақты өңірлер үшін ерекше маңызы бар нысандарға басымдық беріледі, – деді Назгүл Хатепова.

Вице-министр Жетісудағы қант қызылшасын өңдеу мәселесіне де тоқталды. Биыл өңірде 13,5 мың гектар алқапқа қант қызылшасы егілген. Өнімді жаңғыртудан өткен Көксу және Ақсу қант зауыттары қабылдауда. Ал Ақсу зауытының табиғи газға қосылуы өндірістік шығындарды азайтып, өнімнің өзіндік құнын төмендетуге ықпал етеді.

Сонымен қатар жүгері егістігін ұлғайту және оны терең өңдеу бағытындағы мүмкіндіктер талқыланды. Жамбыл облысында қытайлық инвесторлармен бірлесіп құрылған кәсіпорын Жетісу шаруалары үшін қосымша өткізу нарығын қалыптастырмақ.

Назгүл Хатепова сүтті мал шаруашылығын қолдау шараларына да тоқталды. Оның мәліметінше, жеңілдетілген қаржыландыру аясында жүзден астам тауарлы-сүт фермасын құру жоспарланса, соның 71-і пайдалануға берілген. Сондай-ақ ауыл шаруашылығын цифрландыру, субсидия алу рәсімдерін жеңілдету және қағазбастылықты азайту мәселелері қозғалды.

Жиында Жалпыұлттық құрылыс жылы жергілікті кәсіпкерлер үшін де жаңа мүмкіндіктер ашатыны айтылды. Жаңа нысандардың құрылысы құрылыс материалдарына, жабдықтар мен көлік қызметтеріне сұранысты арттырып, қосымша жұмыс орындарын құруға және бюджет түсімдерін ұлғайтуға ықпал етеді. Сонымен бірге жобалардың жүзеге асырылуына қоғамдық бақылау жүргізудің маңыздылығы атап өтілді.

Осылайша, Достық үйінде өткен кездесуде Президент Жолдауында айқындалған міндеттер өңірдің нақты қажеттіліктерімен ұштастыра отырып талқыланды. Бұл ретте әлеуметтік қызметтердің қолжетімділігін арттыру, кәсіпкерлікті қолдау және ауыл шаруашылығын дамыту бағытындағы нақты нәтижелер халықтың әл-ауқатын жақсартудың маңызды көрсеткіштері болмақ.

https://www.gov.kz/org/zhetysu-oblysy/press/news/details/1323451?lang=kk

Ақмола облысының отбасы «Мерейлі отбасы – 2026» ұлттық байқауының лауреаты атанды

Бір шаңырақ астында үш ұрпақтың тату-тәтті өмір сүріп, әулет тарихының жеті онжылдыққа жуық уақытты қамтуы сирек кездесетін жағдай. Бұған Ақмола облысы Қосшы қаласындағы Ілиясовтар әулеті дәлел. Бүгінде бұл үлкен әулет балаларды, немерелерді, шөберелер мен шөпшектерді біріктіріп отыр. Ал әулеттің үлкені Қарлығаш апаның жасы 85-те. Дәстүрді берік сақтап, бір-біріне қолдау көрсетіп келе жатқан отбасының өнегелі тарихы республикалық деңгейде мойындалды. Ілиясовтар «Мерейлі отбасы – 2026» ұлттық байқауының лауреаты атанып, екі миллион теңге көлеміндегі сертификатқа ие болды.

Марапаттау рәсімі Астана қаласында өтті. Биыл байқауда еліміздің әр өңірінен қатысқан 20 отбасы жеңімпаз атанды. Қатысушыларды ҚР Мәдениет және ақпарат министрі Арман Қырықбаев құттықтап, өскелең ұрпақ тәрбиесіндегі және ұлттық құндылықтарды сақтаудағы отбасының маңызды рөлін атап өтті.

Марапатталғандардың қатарында 68 жылдық тарихы бар Ілиясовтар әулеті де бар. Үлкен әулеттің негізін Саламат Шахманұлы мен Қарлығаш Жұмабайқызы қалаған. Ерлі-зайыптылар төрт бала тәрбиелеп өсірді. Кейін олардың әрқайсысы өз алдына шаңырақ көтерді. Бүгінде әулетте 12 немере, 33 шөбере және екі шөпшек бар.

1992 жылы Саламат Ілиясов 52 жасында өмірден өтті. Содан бері отбасылық ошақтың шырағын сөндірмей, үлкен әулеттің басын біріктіріп отырған – Қарлығаш Жұмабайқызы. Жасы 85-ке келсе де, ол әлі күнге дейін ұрпағының ортасында сый-құрметке бөленіп келеді.

Ілиясовтар отбасының ерекшелігі – бүгінде бір шаңырақ астында үш буын әйелдің бірге тұруы. 85 жастағы Қарлығаш апамен бірге оның келіні Сұлуай Қуанышқызы және Сұлуайдың келіні Райхан бір үйдің шаруасын дөңгелетіп отыр. Әрқайсысының өмірлік тәжірибесі, мінезі мен дағдысы әртүрлі болғанымен, олар ортақ шаруаны бірге атқарып, бір-біріне көмектеседі әрі үлкендердің салған сара жолын жалғастырып келеді.

Жылдар өте әулет өсіп-өніп, оның мүшелері түрлі мамандықты таңдады. Үлкен ұлы Ғабиден Ілиясұлының еңбек жолы педагогика саласымен тығыз байланысты. Ол Целиноград, қазіргі Ақмола ауданындағы білім беру жүйесінде 40 жылға жуық еңбек етті.

Ал оның інісі Қазбек бүгінде немерелерін өзі тәрбиелеп, оларға ата-анасынан алған тәлім-тәрбиені беріп келеді. Қызы Бағила Дамишева мемлекеттік қызмет саласын таңдаған. Ол Қарағанды облысы Егінді ауылдық округі әкімінің аппаратында бас маман болып жұмыс істейді. Үш бала тәрбиелеп өсірген Бағила бүгінде 11 немеренің әжесі.

Тағы бір қызы Алмагүл Қуатбекова да отбасындағы ұстаздық дәстүрді жалғастырған. Ол Қарағанды облысындағы Талғат Бигелдинов атындағы мектепте математика пәнінен сабақ береді. Еңбек жолында кәсіби байқауларда бірнеше рет жүлделі орындарға ие болып, түрлі деңгейдегі марапаттармен марапатталған.

Қарлығаш Жұмабайқызының 85 жас мерейтойына қызы Бағила ерекше сый жасады. Ол анасына арнап «Өмір жолындағы отбасылық естеліктер» атты кітап дайындаған. Басылымда ата-анасының өмірі, еңбек жолы, бала тәрбиесі мен отбасылық дәстүрлер туралы естеліктер жинақталған. Осылайша, Ілиясовтар әулетінің кейінгі ұрпақ оқып, таныса алатын өз шежіресі жарық көрді.

«Мерейлі отбасы» байқауындағы марапат үлкен әулеттің тарихындағы тағы бір маңызды оқиға болды. Ұлттық байқау Қазақстанда 2014 жылдан бері өткізіліп келеді. Осы уақыт ішінде Ақмола облысынан ғана екі мыңнан астам отбасы қатысқан. Жыл сайын байқау аясында отбасылық дәстүрлерді сақтап, бала тәрбиесіне ерекше мән беретін және өмірлік тәжірибесін кейінгі ұрпаққа жеткізіп жүрген өнегелі отбасыларға құрмет көрсетіледі.

Президент Жолдауы – ел дамуының жаңа бағдарлары
Мемлекет басшысының Қазақстан халқына арнаған Жолдауы – еліміздің алдағы даму бағыттарын айқындайтын, қоғамның өзекті мәселелерін қамтитын маңызды стратегиялық құжат. Онда ел экономикасын нығайту, халықтың әл-ауқатын арттыру, әлеуметтік саланы дамыту, инфрақұрылымды жаңғырту және мемлекеттік басқару жүйесін жетілдіру бағытындағы басым міндеттер белгіленген.
Президент Жолдауының басты ерекшелігі – нақты мақсаттар мен жүйелі міндеттерге негізделуі. Әсіресе, халықтың өмір сүру сапасын жақсарту, ауылдық аумақтарды дамыту, жаңа жұмыс орындарын ашу, кәсіпкерлікті қолдау және білім беру мен денсаулық сақтау салаларының әлеуетін арттыру мәселелеріне ерекше назар аударылуы көңіл қуантады.
Ауылдық жерлерді дамыту – елдің тұрақты дамуының маңызды шарты. Себебі ауылдың өркендеуі – тұтас өңірдің әлеуметтік-экономикалық әлеуетінің артуы. Жолдауда көтерілген инфрақұрылымды жаңарту, жол сапасын жақсарту, инженерлік желілерді дамыту және тұрғындарға қолайлы жағдай жасау міндеттері ауданымыз үшін де маңызды.
Сонымен қатар, білім беру саласын жетілдіру, өскелең ұрпаққа сапалы білім мен саналы тәрбие беру, жастардың бастамаларына қолдау көрсету – болашаққа бағытталған маңызды қадамдар. Бүгінгі жастардың білімі мен белсенділігі ертеңгі ел дамуының негізін қалайды.
Мемлекет басшысы айқындаған міндеттерді жүзеге асыруда мемлекеттік органдармен қатар, азаматтық қоғам институттарының, еңбек ұжымдарының және әрбір тұрғынның белсенділігі маңызды рөл атқарады. Өйткені елдің дамуы – ортақ жауапкершілік пен бірлескен еңбектің нәтижесі.
Президент Жолдауы – тек алдағы кезеңге арналған жоспар ғана емес, сонымен қатар әр азаматты ел болашағына бейжай қарамауға, нақты іспен үлес қосуға үндейтін маңызды құжат.
Біздің ортақ мақсатымыз – өркендеген ауыл, дамыған аудан, әл-ауқаты жоғары қоғам және қуатты Қазақстан құру. Осы мақсатқа жету жолында Жолдауда белгіленген міндеттерді жүйелі жүзеге асырудың маңызы зор.
Ел дамуы – әрқайсымыздың қолымызда. Бүгінгі нақты іс – ертеңгі жарқын болашақтың кепілі!

🌿 «Таза Қазақстан» – ортақ жауапкершілік!

Ақтөбе қаласында экологиялық мәдениетті қалыптастыруға бағытталған игі бастама жүзеге асырылды. Жастар пластик қалдықтарын жинап, қоршаған ортаны қорғауға өз үлестерін қосты.

Таза табиғат – жарқын болашақтың кепілі! ♻️

Ақмола облысы энергетикалық профицитке дайындалуда: алдағы үш жылда не өзгереді?

2029 жылға қарай Ақмола облысы электр қуатының профицитіне шығуды жоспарлап отыр. Ол үшін өңірде тозған электр желілері жаңартылып, жаңа қосалқы станциялар салынып, электр энергиясын өндіретін өз көздерін іске қосу жұмыстары жүргізілуде. Жобалар Көкшетау, Қосшы қалаларын және бірқатар ауылдық елді мекендерді қамтиды. Нақты жоспарлар туралы облыстық энергетика және тұрғын үй-коммуналдық шаруашылық басқармасының басшысы Бақтбек Жапаев айтып берді.

Бүгінде өңірдегі электр желілерінің жалпы ұзындығы шамамен 32 мың шақырымды құрайды. Соңғы екі жылда 5 мың шақырымнан астам электр желісі мен 1300-ге жуық қосалқы станция жөндеуден өтті. Нәтижесінде желілердің тозу деңгейі 62%-дан 59%-ға дейін төмендеді. Алдағы уақытта тағы 75 жобаны іске асыру жоспарланып отыр. Бұл көрсеткішті 57%-ға дейін қысқартуға мүмкіндік береді.

Басты міндеттердің бірі – электр энергиясына деген сұраныстың артуын қамтамасыз ету. Әсіресе Көкшетау, Қосшы қалаларында, Бурабай, Аршалы және Бұланды аудандарында тұрғын үй құрылысы мен кәсіпорындардың дамуына байланысты электр тұтыну көлемі өсіп келеді.

Көкшетау қаласындағы «Көкше» қосалқы станциясының қуатын екі автотрансформаторды ауыстыру арқылы 250-ден 380 МВА-ға дейін арттыру көзделген. Жұмыстарды келесі жылыту маусымы басталғанға дейін аяқтау жоспарланып отыр. Бұл облыс орталығын, сондай-ақ Бурабай және Зеренді аудандарын қосымша электр қуатымен қамтамасыз етуге мүмкіндік береді. Бұдан бөлек, қалада екі жаңа қосалқы станцияның жобасы әзірленуде, тағы екеуі жобалау сатысында.

Қосшы қаласында екі қосалқы станцияны реконструкциялау және алты тарату пунктін салу жобалары аяқталды. Сонымен қатар жаңа қосалқы станция салу көзделген. Бұл жобаларды іске асыру Астана агломерациясын дамыту жоспарларымен сабақтастырылады.

Ауылдық елді мекендерді электрмен қамтамасыз ету де жаңғырту жұмыстарының маңызды бағыты. Келесі жылы Аршалы ауданындағы Костомар, Целиноград ауданындағы Қажымұқан және Қоянды ауылдарында шамамен 400 шақырым электр желісінің құрылысын аяқтау жоспарланған. Жоба 27 мыңға жуық тұрғынды қамтиды. Зеренді ауданында 31 елді мекенге жаңа электр желілерін тарту көзделген. Бұл 17 мың тұрғынның электрмен жабдықталуын жақсартуға мүмкіндік береді.

Электр энергиясын өндіру көлемін арттыруға да ерекше назар аударылып отыр. Бұл бағыттағы негізгі жоба – қуаттылығы 240 МВт болатын Көкшетау жылу электр орталығының құрылысы. Оны 2029 жылы пайдалануға беру жоспарланған. Сонымен қатар 2027–2028 жылдары алты жаңа жел электр станциясын іске қосу көзделіп отыр. Қазір облыста жаңартылатын энергия көздерінің 19 нысаны жұмыс істейді. Оның 18-і – жел электр станциясы, біреуі – күн электр станциясы.

«Көкшетау ЖЭО-сының және жаңа жел электр станцияларының құрылысы электр желілерін жаңғыртумен қатар өңірде қажетті қуат қорын қалыптастыруға мүмкіндік береді. Бұл жаңа тұтынушыларды қосуға, инвестициялық жобаларды жүзеге асыруға және өңірдің одан әрі дамуына жағдай жасайды. Біздің мақсатымыз – 2029 жылға қарай Ақмола облысында электр қуатының профицитіне қол жеткізу», – деп атап өтті Бақтбек Жапаев.