Month: August 2026 (Page 1 of 40)

Ақмола облысының мемлекеттік органдарына 125 мыңнан астам өтініш түскен

Биыл жеті айда Ақмола облысының әкімшілік органдарына 125 мыңнан астам өтініш түскен. Оның 90 пайыздан астамы «e-Otinish» жүйесі арқылы электронды форматта жолданған, деп хабарлайды Өңірлік коммуникациялар қызметі.

Өтініштерді есепке алу саласындағы жұмыстың негізгі көрсеткіштері туралы брифингте ҚР Бас прокуратурасы Құқықтық статистика және арнайы есепке алу жөніндегі комитетінің Ақмола облысы бойынша департаменті Өтініштерді талдау және бақылау бөлімінің басшысы Ләззат Құдабаева айтып берді.

Өтініштердің басым бөлігі жеке тұлғалардан түскен – шамамен 104 мың. Өңір тұрғындары көбіне жер қатынастары, білім беру, тұрғын үй-коммуналдық шаруашылығы, сот жүйесі және құрылыс мәселелерін көтерген.

«Өтініштер халықты алаңдатқан мәселелерді дер кезінде анықтап, оларды шешу үшін қажетті шаралар қабылдауға мүмкіндік береді. Оларды сапалы әрі объективті қарау мемлекеттік органдарға деген азаматтардың сеніміне тікелей әсер етеді», – деді Ләззат Құдабаева.

Есепті кезеңде шамамен 85 мың өтініш қаралған, тағы 31 мыңға жуық өтініш құзыретіне сәйкес басқа мемлекеттік органдарға жолданған.

Бүгінде азаматтардың өтініштерімен жұмыс жүргізу үдерісі цифрлық форматқа белсенді түрде көшуде. Жеті айда «e-Otinish» жүйесі арқылы 115 мыңға жуық өтініш түскен. Жүйе азаматтарға өтініштерді онлайн жолдауға, олардың қаралу барысын бақылауға және қажет болған жағдайда қабылданған шешімге шағымдануға мүмкіндік береді.

«Бүгінде азаматтардың өтініштері халықты толғандыратын мәселелер туралы маңызды ақпарат көзі болып отыр. Бұл деректерді талдау жүйелі сипаттағы мәселелерді анықтап, қажетті басқарушылық шешімдер қабылдауға мүмкіндік береді», – деп атап өтті спикер.

Сонымен қатар цифрлық платформа одан әрі жетілдіріліп келеді. Жүйеде өтініштерді автоматты түрде талдау үшін жасанды интеллект элементтері енгізілуде. Қауіп-қатерлерді анықтауға арналған аналитикалық жасанды интеллект моделі қазірдің өзінде білім беру, тұрғын үй-коммуналдық шаруашылығы, жер қатынастары, жолдардың сапасы, денсаулық сақтау және әлеуметтік қорғау сияқты алты саланы қамтиды.

«Жаңа технологияларды пайдалану проблемалық мәселелерді жедел анықтап, мемлекеттік органдардың күш-жігерін оларды шешуге бағыттауға мүмкіндік береді», – деп қорытындылады Ләззат Құдабаева.

Қазақ жастары өткенге мұңмен емес, мақтанышпен қарауы керек

«Жасампаз ұлт» бағдарламасының жүргізушісі Айгерім Құсайынқызы Тамыз конференциясында Мемлекет басшысының «мұң, қайғы, күйзеліс жастарға жат дүние болуы керек» деген пікірін атап өтті.

Осы орайда білім сарапшысы Нұрбек Ерікұлы бұл бастаманы қолдай отырып, тарихты тек ашаршылық, қуғын-сүргін мен қасірет арқылы таныту өскелең ұрпақтың дүниетанымына кері әсер етуі мүмкін екенін жеткізді.

Сондықтан тарихта ел дамуына үлес қосқан ғалымдар, Алаш зиялылары мен көрнекті тұлғалардың жетістігін кеңінен насихаттау маңызды. Осындай көзқарас жастардың бойында оптимизм, мақтаныш пен ұлттық сенім қалыптастырады.

Толық бағдарламаға сілтеме:
https://youtu.be/x6zw9NwzRVI?si=eQtVsg6KtAHnFHZd

Блогерлердің жазалануы және оған көзқарас
А.Байтұрсынұлы атындағы Тіл білімі институтының директоры А.Фазылжан интернетте былапыт сөз қолданатын адамдарды жауапкершілікке тарту тәжірибесін орынды деп санайды. Оның пікірінше, мұндай теріс әрекеттер салдарсыз қалмауы тиіс. Тиісті жауапкершілік шараларын қолдану басқа интернет қолданушыларына ескерту болмақ.

Таза сөз – игі ниет пен қоғамдық тәртіптің негізі
А.Байтұрсынұлы атындағы Тіл білімі институтының директоры А.Фазылжан адамның ой-ниеті мен сөзінің тазалығы маңызды екенін атап өтті. Сарапшының айтуынша, ой тазалығы дегеніміз – ниеттің шынайылығы мен ізгілігі. Адамның ішкі ұстанымы оның іс-әрекетінің сипатын айқындайды: ойы мен ниеті таза болса, әрбір іс игі әрі жасампаз мәнге ие болады.

СЕМЕЙ СЫНАҚ ПОЛИГОНЫ: ЗЕРТТЕУЛЕРДІҢ ЖАҢА ДӘУІРІ
2026 жылы Семей сынақ полигонының жабылғанына 35 жыл толады. 1991 жылғы 29 тамызда Қазақстан Президентінің Жарлығымен әлемдегі ең ірі ядролық полигондардың бірі өз жұмысын тоқтатты. Бұл шешім еліміз үшін ғана емес, бүкіл әлемдік ядролық қаруға қарсы қозғалыс үшін де тарихи маңызға ие болды. Алайда полигонды жабу сынақтардың қырық жылға жуық уақыттағы зардаптарын жоюға қарағанда әлдеқайда оңай болды. Ұлан-ғайыр аумақта сынақ объектілері, штольнялар мен ұңғымалар, радиоактивті ластанған учаскелер қалды, ең бастысы – бұл аумақта не болып жатқаны және оның қаншалықты қауіпсіз екені туралы тұтас түсінік іс жүзінде болмады.
Осы жылдар бойы Қазақстан Республикасының Ұлттық ядролық орталығы бұрынғы полигонды зерттеу және оны қауіпсіз жағдайға келтіру бойынша негізгі жұмыстарды жүргізіп келеді. 35 жыл ішінде не атқарылды, бүгінгі таңда ССП аумағы қаншалықты зерттелді, қай жерлер әлі де ерекше режимді қажет етеді және полигон тарихына біржолата нүкте қоюға бола ма – бұл туралы Радиациялық қауіпсіздік және экология институтының директоры Айдарханов Асан Оралханұлымен сұхбатымызда сөз болады.

• Семей сынақ полигонының жабылғанына 35 жыл өтті. 1990 жылдардың басында оның аумағы қандай жағдайда болды?
• Ең алдымен, ауқымын түсіну қажет. Семей сынақ полигонының аумағы шамамен 18,3 мың шаршы километрді құрайды. Бұл аумақта ондаған жылдар бойы жер үсті, әуе және жерасты ядролық сынақтарын жүргізуге арналған аса күрделі инфрақұрылым қалыптастырылды.
  Полигон жабылғаннан кейін мұнда штольнялар, сынақ ұңғымалары, техникалық құрылыстар, радиоактивті түсімдердің іздері және жекелеген жергілікті ластану учаскелері қалды. Сонымен қатар бүкіл аумақтың радиациялық жағдайы туралы толық көрініс болған жоқ.
  Сондықтан полигонды жабу – алғашқы әрі аса маңызды қадам ғана болды. Ластану нақты қай жерде шоғырланғанын, радионуклидтердің табиғи ортада қалай әрекет ететінін, олардың таралу жолдары бар-жоғын және қай аумақтарға кіруді шектеу мен арнайы қауіпсіздік шаралары қажет екенін анықтау керек болды.
• Яғни полигон жабылғаннан кейін бүкіл аумақты жай ғана қоршап қойып, мәселе шешілді деп есептеуге болмайтын болды ма?
• Жоқ. Оның үстіне кейінгі зерттеулер ССП-ның бүкіл аумағын бірдей қауіпті деп қарастыру дұрыс болмайтынын көрсетті.
  Мұндағы радиациялық жағдай өте әркелкі. Сынақ жүргізу үшін тікелей пайдаланылмаған едәуір кең аумақтар бар. Негізгі ластану нақты сынақ алаңдарымен, радиоактивті түсімдердің іздерімен және жекелеген жергілікті учаскелермен байланысты.
  Сондықтан бұрынғы полигонның бүкіл аумағына формалды түрде қарамай, әрбір учаскені егжей-тегжейлі ғылыми зерттеу қажет болды.
• Ұлттық ядролық орталықтың жұмысы неден басталды?
• Алғашқы кезектегі міндеттердің бірі ядролық сынақтарды жүргізуге тікелей байланысты нысандарды қауіпсіз жағдайға келтіру болды.
  Дегелең тау массивінде жерасты ядролық жарылыстары жүргізілген штольнялар, ал «Балапан» алаңында сынақ ұңғымалары орналасқан. Оларды одан әрі пайдалануға және рұқсатсыз кіруге жол бермеу қажет болды.
  Көптеген жылдар бойы штольнялар мен ұңғымаларды жою және консервациялау жұмыстары жүргізілді, аса маңызды нысандардың физикалық қорғалу деңгейі күшейтілді. Бұл жұмыс радиациялық қауіпсіздік тұрғысынан ғана емес, ядролық қаруды таратпау тұрғысынан да үлкен маңызға ие болды.
• Бүгінде бұрынғы полигон аумағы қаншалықты зерттелген?
• Осы жылдар ішінде орасан зор көлемде зерттеу жұмыстары жүргізілді. Мамандар топырақты, жерүсті және жерасты суларын, атмосфералық тасымалды, өсімдіктер дүниесін және жануарлар әлемін зерттеді. Жүздеген мың өлшеу жасалды.
  Бүгінде Ұлттық ядролық орталықтың радиоэкологиялық базасында қоршаған орта объектілерінің 150 мыңнан астам сынамасы туралы мәлімет бар. Әрбір сынама бойынша далалық және зертханалық зерттеулердің нәтижелері, соның ішінде сынама алынған координаттар, радиометриялық параметрлер және радионуклидтік құрамы тіркеледі.
  Сонымен қатар мыңнан астам тақырыптық қабатты және 100 мыңнан астам объект туралы мәліметті қамтитын мамандандырылған геоақпараттық жүйе құрылды.
  Іс жүзінде ондаған жылдар бойғы зерттеулер нәтижесінде бұрынғы полигон аумағының толыққанды радиациялық картасы қалыптастырылды.
• Ғалымдар үшін қандай радионуклидтер негізгі қызығушылық тудырады?
• Техногенді радионуклидтердің бірқатар түрінің – цезий-137, стронций-90, америций-241, тритий, плутоний изотоптарының қозғалысы зерттеледі.
  Олардың әрқайсысының өзіндік ерекшеліктері бар. Мысалы, плутоний салыстырмалы түрде аз қозғалмалы және топырақта ұзақ уақыт сақталуы мүмкін. Цезий биологиялық процестерге қосыла алады, ал стронций кальцийге ұқсастығына байланысты сүйек тінінде жинақталуы мүмкін.
  Тритий ластанудың жерасты суларымен жылыстауын зерттеу кезіндегі маңыздылығы ерекше.
  Сондықтан қандай да бір радионуклидтің шоғырлануын ғана емес, оның қаншалықты қозғалмалы екенін, сумен немесе шаңмен тасымалдана алатынын, өсімдіктерге түсіп, одан әрі қоректік тізбектерге ене алатынын түсіну маңызды.
• Радиоактивті заттектердің адамға азық-түлік арқылы түсу мүмкіндігі зерттелді ме?
• Иә. Бұл зерттеулердің жеке әрі маңызды бағыты болды.
  Эксперименттік фермерлік шаруашылықта радионуклидтердің топырақ пен судан мал азықтық өсімдіктерге, одан кейін ауыл шаруашылығы жануарларының ағзасына және мал шаруашылығы өнімдеріне – етке, сүтке, жұмыртқаға өтуі зерттелді. Өңірімізге тән өсімдік шаруашылығы өнімдері де зерттелді.
  Мұндай зерттеулер аумақтың абстрактілі ластану деңгейін емес, жерлерді шаруашылықта пайдаланудың нақты нұсқасы кезіндегі шынайы қатерлерді бағалау үшін қажет.
• Халықты алаңдататын негізгі мәселелердің бірі – ластанудың полигон аумағынан тыс таралу мүмкіндігі. Мұндай қатер қаншалықты бақыланады?
• Сондықтан радионуклидтердің жылыстау жолдарын зерттеуге үлкен көңіл бөлінеді.
  Жерүсті және жерасты сулары, ауа арқылы тасымалдану, эрозиялық процестер зерттеледі. Мысалы, далалық аумақ үшін шаң түзілу факторы маңызды: қатты жел кезінде немесе ластанған топыраққа механикалық әсер еткенде ұсақ бөлшектер ауаға көтерілуі мүмкін.
  Жерасты суларының маңызы ерекше, өйткені сынақтардың едәуір бөлігі жер астында жүргізілді. Тритийдің мөлшері және басқа да көрсеткіштер бойынша мамандар сулардың қозғалыс бағытын, олардың жерүсті су объектілерімен байланысын және радионуклидтерді тасымалдау мүмкіндігін зерттейді.
  Осы процестердің барлығы тұрақты ғылыми тұрғыдан бақылануда.
• Бүгінде полигон аумағының қай бөлігі радиоактивті ластанған деп есептеледі?
• Кешенді экологиялық зерттеп-қарау нәтижелері бойынша шамамен 8 400 шаршы километр аумақ ерекше режимді, бақылауды және оңалту шараларын жүргізуді қажет ететін радиоактивті ластанған жерлер санатына жатқызылды.
  Көпжылдық зерттеулердің нәтижелері кейіннен Семей ядролық қауіпсіздік аймағын қалыптастырудың ғылыми негізіне айналды.
  Бұл ретте кері жағдайды да түсіну маңызды: осы аймақтан тыс жерлер автоматты түрде кез келген қызметке жарамды деп жарияланбайды. Әрбір нақты учаске оның радиациялық жағдайын және оны қандай мақсатта пайдалану жоспарланып отырғанын ескере отырып жеке бағалануы.
• Семей ядролық қауіпсіздік аймағының құрылуы нені түбегейлі өзгертті?
• Бұл – көпжылдық жұмыстың заңды жалғасы болды.
  2023 жылғы 5 шілдеде Қазақстан Республикасының «Семей ядролық қауіпсіздік аймағы туралы» Заңына қол қойылды. Ол аймақтың жұмыс істеуінің құқықтық негіздерін, оңалту шараларын жүргізу тәртібін, радиациялық мониторингке қойылатын талаптарды және халық пен қоршаған ортаның қауіпсіздігін қамтамасыз ету тетіктерін айқындады.
  Яғни ондаған жылдар бойы жинақталған ғылыми деректер нақты құқықтық қолданысқа ие болды. Енді жерлердің режимі зерттеу нәтижелерін, ластану деңгейі мен сипатын, табиғи жағдайларды және аумақты жоспарлы пайдалануды ескере отырып айқындалады.
• 35 жылдан кейін сынақтардың негізгі зардаптары жойылды деп айтуға бола ма?
• Мәселе толық шешілді деп айту дұрыс болмас еді. 35 жыл ішінде өте көп жұмыс атқарылды: бұрынғы сынақ инфрақұрылымы жойылды, орасан зор аумақ зерттелді, бірегей радиоэкологиялық деректер базасы қалыптастырылды, ең ластанған жерлер анықталды, Семей ядролық қауіпсіздік аймағы құрылды.
  Бірақ радиоактивті ластану күнтізбеге сәйкес жоғалмайды. Жекелеген аумақтарда одан әрі оңалту, кіруді шектеу және тұрақты радиациялық бақылау қажет.
  Сондықтан бүгінгі міндетіміз – полигонда өткен уақытта не болғанын білу ғана емес, бұл аумақтың қазір қалай өзгеріп жатқанын түсіну және оның қауіпсіздігін алдағы онжылдықтар бойы қамтамасыз ету.
• Қазақстан жұмыстың едәуір бөлігін шетелдік әріптестермен бірлесіп жүргізді. Халықаралық ынтымақтастық қандай рөл атқарды?
• Сынақтар тоқтатылғаннан кейін бұрынғы полигон аумағындағы бірқатар ірі жобалар шетелдік ғылыми және техникалық ұйымдармен бірлесіп орындалды және бүгінгі таңда да жүзеге асырылып келеді.
  Олар сынақ инфрақұрылымын жоюға, объектілердің физикалық қорғалуын күшейтуге және бұрынғы қызметтен қалған материалдарға байланысты қатерлерді азайтуға бағытталды.
  Бұл жұмыс Қазақстанның ядролық қауіпсіздік және ядролық қаруды таратпау саласындағы халықаралық ынтымақтастығының маңызды бөлігі болып табылады. Семей полигонының тәжірибесі осы тұрғыдан бірегей: ядролық арсеналдан ерікті түрде бас тартқан ел ядролық және радиациялық қатерлерді азайту бойынша жүйелі жұмысты іс жүзінде көрсетті.
• Бүгінде аумақты бақылау үшін дәстүрлі экспедициялармен қатар басқа да әдістер қолданылады. Мониторинг технологиялары қалай өзгерді?
• Аумағы 18 мың шаршы километрден асатын жерде тек жерүсті зерттеулеріне сүйену мүмкін емес.
  Бүгінде олар жерсеріктік бақылаулармен, геоақпараттық технологиялармен және автоматтандырылған бақылау жүйелерімен толықтырылады. Жерсерік деректері өсімдік жамылғысының өзгерістерін, эрозиялық процестерді, жаңа жолдардың пайда болуын, шаруашылық қызметтің іздерін, жекелеген техногендік объектілердің жай-күйін бақылауға мүмкіндік береді.
  Әрине, қашықтан бақылау әдістері сынама алу мен зертханалық талдауды алмастырмайды. Бірақ жинақталған деректер базасымен үйлесімде олар өзгерістерді әлдеқайда жылдам анықтауға және қосымша зерттеу жүргізу қажет учаскелерді белгілеуге мүмкіндік береді.
• Дегенмен, 35 жылдан кейін Семей полигонының жабылуы сіз үшін бүгін нені білдіреді??
• 1991 жылғы 29 тамызда Қазақстан сынақтарды тоқтатты. Бірақ кейінгі 35 жыл полигонды жабу туралы тарихи шешімнің тек бір күнмен шектелмейтінін көрсетті.
  Одан кейін ондаған жылдарға созылған күрделі ғылыми және инженерлік жұмыс жүргізілді: сынақ инфрақұрылымын жою, нысандардың физикалық қауіпсіздігін қамтамасыз ету, радиациялық жағдайды зерттеу, қоршаған орта мониторингі, ластанған аумақтарды оңалту.
  Бүгінде біз ядролық сынақтардың мұрасымен жұмыс істеуден осы аумақты ғылыми негізделген және ұзақ мерзімді басқаруға көшу туралы айта аламыз.
  Семей полигоны Қазақстан тарихының бір бөлігі болып қала береді. Біздің міндетіміз – оның мұрасы адамдар мен қоршаған орта үшін ешқашан бақылаусыз қатер көзіне айналмауы үшін барлық қажетті шараларды жүзеге асыру.
  Спикер: Айдарханов Асан Оралханұлы, Радиациялық қауіпсіздік және экология институтының директоры

Ақмола облысының әкімдігінде инклюзивті саясатты іске асыру және жұмыссыз азаматтардың басым санаттарын жұмыспен қамту мәселелері талқыланды
2026 жылғы 26 тамызда Ақмола облысының әкімдігінде облыс әкімінің орынбасары А.Б.Әміренованың төрағалығымен инклюзивті саясат тұжырымдамасын іске асыру және жұмыссыз азаматтардың басым санаттарын жұмыспен қамту мәселелері бойынша жұмыс кеңесі өтті.

Кеңес барысында Тұжырымдама ережелерін іске асырудың өзекті мәселелері, сондай-ақ жұмыссыз азаматтардың басым санаттарына жататын азаматтардың жұмыспен қамтылуына және жұмысқа орналасуына жәрдемдесу шаралары қаралды.

Кеңеске мүдделі мемлекеттік органдардың өкілдері офлайн форматта, сондай-ақ Ақмола облысының аудандары мен қалалары әкімдіктерінің өкілдері бейнеконференцбайланыс режимінде қатысты.

Кеңес қорытындысы бойынша жауапты мемлекеттік органдар мен жергілікті атқарушы органдарға Тұжырымдаманы одан әрі іске асыру және жұмыссыз азаматтардың басым санаттарын жұмысқа орналастыру жөніндегі жұмысты күшейту бойынша тиісті тапсырмалар берілді. https://www.gov.kz/memleket/entities/aqmola-social/press/news/details/1280208?lang=kk

«Таза жағалау» экологиялық акциясы аясында 29 тамызда жағалаулар мен су айдындарына жақын аумақтарды тазалау үшін тазалық күндері жоспарланған.

Біз тұрғындарды, еріктілерді, ұйымдардың өкілдерін және барлық мүдделі азаматтарды тазалық күндеріне қатысып, таза қоршаған ортаны сақтауға үлес қосуға шақырамыз.

Жағалауларымызды таза ұстау барлығының қатысуынан басталады! 

Ұйымдастырушылар: ҚР Экология және табиғи ресурстар министрлігі, облыстар, Астана, Алматы және Шымкент ққ. әкімдіктері

ҰЛТТЫҚ САНАНЫ ДҰРЫС ҚАЛЫПТАСТЫРУ КЕРЕК!

Зерендіде Ақмола облысының волонтерлер лагері өтті

Зеренді ауданында «CHANGEMAKER CAMP: «Өзгеріс өзіңнен басталады» атты Ақмола облысы волонтерлерінің лагері өтті. «Парус» демалыс базасында облыстың қала-аудандарынан келген белсенді жастар, үкіметтік емес ұйымдардың, сондай-ақ республикалық және халықаралық волонтерлік ұйымдардың өкілдері бас қосты.

Лагерь бағдарламасы танымдық кездесулерді, шеберлік сабақтарын, командалық ойындар мен бейресми қарым-қатынасты қамтыды. Қатысушылар өзара танысып, тәжірибе алмасып, түрлі байқаулар мен интерактивті бағдарламаларға қатысты.

Лагерьдің ашылуында Ақмола облысының ішкі саясат басқармасының басшысы Гүлмира Кәрімова мен Ұлттық волонтерлік желінің атқарушы директоры Татьяна Миронюк волонтерлерге ізгі тілектерін білдірді.

Гүлмира Кәрімова волонтерлердің қоғам өміріне қосып жүрген үлесін жоғары бағалап, олардың еңбегін нақты көрсеткіштермен өлшеу мүмкін емес екенін атап өтті.

«Патриотизм туралы үлкен сөз айтқым да келмейді. Сіздердің волонтер болуыңыздың өзі – патриот екендеріңіздің белгісі. Адамдар үшін, ел үшін, мемлекеттің дамуы үшін атқарып жүрген істеріңіз баға жетпес. Сіздердің үлестеріңізді қандай да бір санмен өлшеу мүмкін емес. Мұның барлығы – жүректегі мейірімнен», – деді Гүлмира Кәрімова.

Татьяна Миронюк Қазақстанның БҰҰ Бас Ассамблеясының 75-сессиясында Тұрақты даму жолындағы халықаралық волонтерлер жылын жариялау бастамасын көтергенін атап өтті. Бүгінде бұл бастаманы әлемнің 130-дан астам елі қолдап отыр.

Лагерь аясында қатысушылар «Өзгеріс өзіңнен басталады» тақырыбындағы шеберлік сабағына қатысып, жеке бастамашылдық пен жауапкершіліктің маңызын талқылады. Сонымен қатар «Мейірім-Зеренді» қоғамдық қорының әлеуметтік-шығармашылық шеберлік сабағы ұйымдастырылды.

Лагерьдің негізгі тақырыптарының бірі «Заң және тәртіп» идеологемасына арналды. Ақмола облысы Полиция департаменті Әкімшілік полиция басқармасының басшысы Ержан Қошқарбаев жол қауіпсіздігі, жол қозғалысы ережелерін сақтау, сондай-ақ мопедтер мен электрмопедтерді пайдалану кезіндегі жауапкершілік туралы айтты.

Зеренді ауданы прокуратурасының прокуроры Асқар Дастан заңның қоғамдағы орны, адам құқықтары және жеке жауапкершілік мәселелеріне тоқталды. Сонымен қатар қатысушыларға интернет-алаяқтықтың кең таралған түрлері туралы бейнероликтер көрсетіліп, түрлі жағдайлар талқыланды.

Лагерьге қатысушылардың бірі – Зеренді ауылының 18 жастағы тұрғыны Ескендір Серік. Ол үш жылдан бері волонтерлік қызметпен айналысады. Осы уақыт ішінде қарт адамдарға көмек көрсетіп, экологиялық акциялар мен сенбіліктерге қатысып келеді.

«Мұндай шаралар жастар үшін өте пайдалы. Мұнда басқа аудандардан келген жастармен танысып, тәжірибе алмасуға, жаңа дүниелерді үйренуге мүмкіндік бар. Мен волонтерлікпен үш жылдан бері айналысамын және адамдарға көмектесу маңызды деп санаймын», – дейді Ескендір Серік.

Лагерь командалық ойындар мен бейресми кездесулерге ұласты. «CHANGEMAKER CAMP» аясында Ақмола облысының әр өңірінен келген волонтерлер өзара танысып, тәжірибе алмасып, бастамалары мен жобаларын талқылады.