Month: August 2026 (Page 14 of 40)

🔹Қазақстанның энергия теңгеріміндегі ЖЭК үлесі алты жылда 4 есеге өсті

▪️Қазақстанда жаңартылатын энергетика секторын жүйелі дамыту жұмыстары жалғасуда. Соңғы алты жылда елдің энергия теңгеріміндегі жаңартылатын энергия көздері (ЖЭК) объектілері өндіретін электр энергиясының үлесі төрт есеге – 2%-дан 8%-ға дейін өсті.

▪️Көрсеткіштің өсуі мемлекеттік саясаттың жүйелі шараларын іске асыру, ЖЭК жобаларын іріктеу бойынша аукциондар өткізу, инвестициялар тарту және жаңа генерациялау қуаттарын іске қосу нәтижесінде қамтамасыз етілді.

▪️Бүгінде елімізде жалпы белгіленген қуаты 3,8 ГВт-тан асатын 172 ЖЭК нысаны жұмыс істейді. Оның ішінде 71 жел электр станциясы және 54 күн электр станциясы бар. Сонымен қатар 44 гидроэлектр станциясы және үш биогаз станциясы жұмыс істеп тұр.

▪️2025 жылдың қорытындысы бойынша ЖЭК нысандары 8,6 млрд кВт·сағ электр энергиясын өндірді. Бір жыл ішінде жалпы қуаты 500 МВт-тан асатын тоғыз жаңа нысан пайдалануға берілді.

▪️Саланы дамыту жұмыстары 2026 жылы да жалғасуда. Биыл жалпы қуаты 245 МВт болатын тағы 10 ЖЭК нысанын іске қосу жоспарланған. Оның ішінде төрт жел электр станциясы, бес күн электр станциясы және бір гидроэлектр станциясы бар. Жыл қорытындысы бойынша жаңартылатын энергия көздерінен өндірілетін электр энергиясының көлемі 8,8 млрд кВт·сағ-қа жетеді деп күтілуде.

▪️Жақын перспективада жалпы қуаты 3,6 ГВт болатын шамамен 100 жобаны іске асыру жоспарлануда. Бұдан бөлек, жалпы қуаты тағы 4 ГВт болатын ірі ЖЭК жобалары пысықталуда.

▪️Салаға TotalEnergies, China Power, Masdar және China Energy сияқты ірі халықаралық инвесторлар тартылды. Олардың қатысуы заманауи технологиялар мен инвестицияларды тартуға, сондай-ақ жаңа генерациялау қуаттарын ұлғайтуға мүмкіндік береді.

▪️Алдағы уақытта бұл шаралар елдің энергия теңгеріміндегі таза энергетиканың үлесін арттыруға, энергетикалық жүйенің тұрақтылығын қамтамасыз етуге және энергетикалық қауіпсіздікті нығайтуға мүмкіндік береді.

Ивановка ауылында 60 жылға жуық тарихы бар мектеп жаңарды

Зеренді ауданындағы Ивановка ауылында 60 жылға жуық тарихы бар бастауыш мектеп күрделі жөндеуден кейін қайта ашылды. Жаңарған білім ордасы оқушылар мен ұстаздарға жайлы әрі қолайлы жағдай ұсынады.

Мектеп ғимараты 1968 жылы салынған, 1973 жылдан бері білім беру нысаны ретінде жұмыс істеп келеді. Қазір мұнда 0–4 сыныптарда 21 оқушы білім алып, 3 мұғалім еңбек етеді.

Күрделі жөндеу жұмыстары кәсіпкерлердің әлеуметтік жауапкершілігі аясында жүргізілді. Бұл іске «Намыс Групп» ЖШС басшысы, аудандық мәслихат депутаты Ерден Елеулов пен «Кемид» ЖШС басшысы Андрей Шарипов қолдау көрсетті.

Салтанатты шарада аудан әкімі Асет Құрманғожин кәсіпкерлерге алғысын білдіріп, олардың қолдауын туған өлкенің болашағына жасалған маңызды инвестиция екенін атап өтті.

Ерден Елеуловке «Зеренді ауданына сіңірген еңбегі үшін» төсбелгісі мен алғыс хат, ал Андрей Шариповке алғыс хат табысталды.

Жаңарған мектеп – ауыл балалары үшін сапалы білім алуға, дамуға және үлкен армандарға қадам басуға жаңа мүмкіндік.

«Жасыл Ел» — жастардың еңбегі мен белсенділігін біріктірген жоба 🌿

Биыл жазда Ақмола облысының барлық аудандары мен қалаларынан 1 мыңға жуық жас «Жасыл Ел» еңбек жасақтарының құрамында жұмыс істеді.

Жастар елді мекендерді абаттандыруға, қоғамдық аумақтарды күтіп ұстауға және басқа да қоғамдық пайдалы жұмыстарға атсалысты. Барлық қатысушымен еңбек шарты жасалып, бұл көптеген мектеп оқушылары мен студенттер үшін алғашқы ресми жұмыс тәжірибесіне айналды.

📍 Жобаға облыстың барлық аумағы қамтылды. Ең ірі еңбек жасақтары Көкшетау, Степногорск қалаларында, Бурабай және Целиноград аудандарында жұмыс істеді.

«Жасыл Ел» — бұл тек еңбекпен қамту емес. Бұл — жауапкершілікке, еңбек тәртібіне және командалық жұмысқа баулитын, туған өлкені көркейтуге үлес қосуға мүмкіндік беретін маңызды жастар жобасы.

🌱 Еңбек еткен жас — ел болашағына үлес қосқан жас!

Ақмола облысында білім берудің цифрлық мүмкіндіктері кеңейіп келеді

Ақмола облысында білім беру жүйесін цифрландыру жұмыстары жүйелі түрде жалғасуда. Басты мақсат – білім сапасын арттырып, оқушылар мен педагогтер үшін заманауи цифрлық орта қалыптастыру.

🔹 Өңірдегі мектептердің 100%-ы интернет желісіне қосылған.
🔹 161 мектепке Starlink спутниктік жабдығы орнатылып, 150–230 Мбит/с жылдамдықтағы интернетке қолжетімділік қамтамасыз етілді.
🔹 Мектептерде 46 мыңнан астам компьютерлік техника пайдаланылуда.
🔹 2025–2026 оқу жылында 134 мектеп талшықты-оптикалық байланыс желісіне қайта қосылды.

Бүгінде цифрлық технологиялар, онлайн платформалар, интерактивті құралдар және жасанды интеллект білім беру процесінің маңызды бөлігіне айналып келеді.

💡 Цифрландыру – тек техникалық жаңғырту емес. Бұл – оқушылардың цифрлық сауаттылығын, сыни ойлауын және жаңа технологияларды тиімді әрі жауапкершілікпен пайдалану дағдыларын дамытуға бағытталған ұзақ мерзімді инвестиция.

Заманауи мектеп – заманауи білім, ал цифрлық мүмкіндіктер – болашаққа жасалған қадам!

S&P Global Қазақстанның тәуелсіз кредиттік рейтингін «BBB» деңгейіне дейін көтерді, болжам «Тұрақты»
 
S&P Global Ratings халықаралық рейтингтік агенттігі Қазақстан Республикасының тәуелсіз кредиттік рейтингін «BBB» деңгейіне дейін көтерді. Агенттіктің шәкілі бойынша рейтингтің осы деңгейіне 2016 жылдан бері алғаш рет қол жеткізіліп отыр.

Тәуелсіз кредиттік рейтингтің көтерілуі елдің экономикалық дамуының орнықты перспективаларын, экономиканың әртараптандырылуы жалғасып жатқанын әрі сыртқы және фискалдық буферлердің айтарлықтай жинақталғанын көрсетеді.

Агенттіктің бағалауы бойынша, Қазақстанның экономикасы сыртқы  сын-қатерлерге және әлемдік тауар нарықтарындағы бағаның құбылмалылығына қарамастан, орнықты болып қалады және орта мерзімді перспективада өсуді жалғастырады.

Сарапшылардың болжамынша, 2026 жылы ЖІӨ-нің нақты өсуі 5,1%-ды құрайды, болашақта Қазақстанның экономикасы мұнай экспорттаушы елдер арасында салыстырмалы түрде жоғары қарқынмен өсетін болады.

S&P экономиканы әртараптандыруға бағытталып, іске асырылып жатқан ауқымды инвестициялық бағдарламаның рөлін атап өтеді. Шикізат өңдеуді және инфрақұрылымды дамыту, оның ішінде «Бәйтерек» ҰИХ» АҚ арқылы дамыту жөніндегі жобалардың қаржыландырылуы келешекте инвестициялар деңгейін ЖІӨ-нің 30%-на дейін ұлғайтуға мүмкіндік береді.

S&P пікірінше, бюджет шығыстарының қалыпты қарқынмен өсуі және салықтық базаны кеңейту жөніндегі шаралар бюджет тапшылығын қысқартуға мүмкіндік береді.

Қазақстан валюталық активтерінің мөлшері сыртқы борышының қалыпты көлемінен асатындай едәуір мөлшерде болғанда, сыртқы кредитор ретінде мықты позициясын сақтайды.

Сондай-ақ, агенттік банк секторының макроэкономикалық күйзелістерге орнықтылығын атап өтті. Реттеу және қадағалау жөніндегі саясаттың біртіндеп жетілдірілуі банк секторының орнықтылығының артуына және активтер сапасына байланысты жүйелік тәуекелдердің төмендеуіне ықпал етті.

Бұның алдында елдің тәуелсіз кредиттік рейтингі «BBB-» деңгейінде болған.

https://t.me/presseconomy

Жалпыхалықтық дауыс берудің қорытындысы бойынша Құрылтайға кәсіби мамандар мен отаншыл азаматтар сайланады деп кәміл сенемін.

Құрылтай әралуан көзқарас пен ұлт келешегі жолындағы ұмтылыстар тоғысатын біртұтас алаң болуға тиіс. Осылайша, Құрылтай ел жаңғыруына тың серпін беретін құрылымға айналмақ.

Біз геосаяси шиеленіс ширығып, жаһандық сын-қатерлер күшейе түскен кезеңде бет алған бағытымыздан таймай, тек алға қарай жүруіміз қажет. Қазақстанды әлемдегі нағыз озық мемлекеттердің қатарына қосу үшін ауқымды жұмыс атқаруымыз керек, яғни ұлттық стратегиямызды табысты жүзеге асыруымыз қажет.

Адамдар көп жағдайда қабылданған маңызды шешімдердің шынайы құндылығын жылдар өткен соң ғана түсінеді. Алдағы жексенбі ел тағдыры үшін дәл осындай бетбұрысты сәт болады.

Біз Қазақстан тарихындағы жаңа кезеңге қадам басамыз. Осындай тағдыршешті сәтте әр адамның дауысы маңызды екені сөзсіз.

t.me/aqorda_resmi

Сайлауалды науқан еліміздегі қоғамдық күн тәртібі өзгергенін, жасампаздық пен өркендеу идеясы мемлекет саясатының арқауына айналғанын айқын көрсетті.

Жұрт алдына жаңа тұлғалар шықты, ұтымды ұсыныстар айтыла бастады. Бұл – түбегейлі саяси жаңғырумен қатар, ұлтымыздың қайта жанданған пассионарлық қуатын танытатын маңызды нышан.

Қоғамдық пікірталасқа жастарымыз, кәсіби қауымдастық өкілдері мен кәсіпкерлер де белсенді қатысты. Мемлекет басшысы ретінде баршаңызға зор ризашылығымды білдіремін.

Жалпы, халқымыздың саяси мәдениеті артып, жұртымыз мемлекеттік басқару ісіне атсалыса бастады. Бұл біз бір ел болып жүргізген реформалардың тікелей нәтижесі екені сөзсіз.

Азаматтарымыз қастерлі Отанымыздың тағдырына шынайы жанашырлық танытып, еліміздің келешегіне жауапты екенін терең сезінуге тиіс. Сонда ғана Қазақстан одан әрі қарыштап дамиды.

Сайлау науқаны отандық және халықаралық байқаушылардың жіті назарында болды. Олар дауыс беру күні де учаскелерде болады.

Біз «Заң мен Тәртіп» қағидаты үстемдік құратын, халық үніне құлақ асатын, саяси және қоғамдық институттары тиімді жұмыс істейтін мемлекет құрып жатырмыз.

t.me/aqorda_resmi

Мемлекет басшысы Қасым-Жомарт Тоқаевтың Құрылтай сайлауы қарсаңындағы үндеуі
 
Құрметті отандастар!
 
Алдағы жексенбі күні елімізде жаңа бірпалаталы Құрылтайдың алғашқы сайлауы өтеді. Бұл – ұлт тағдырына тікелей әсер ететін тарихи оқиға.
 
Еліміз соңғы жылдары ауқымды реформаларды жүзеге асырып, жарқын болашаққа батыл қадам басып келеді. Біз бірлік пен келісімнің және ынтымақтың арқасында Әділетті Қазақстанды құру ісінде зор жетістікке жеттік. Халық Конституциясы күшіне енді, еліміздің даму бағдары өзгерді. Дегенмен атқаратын жұмыс әлі де көп.
 
Бұл сайлау халқымыздың игілігіне қызмет ететін тың реформаларға бастау болып, қазіргі Қазақстан жылнамасындағы жаңа кезеңге жол ашады.
 
Мен партиялардың барлығы дайындық жұмыстарын тиісті деңгейде жүргізуі үшін Құрылтай сайлауы өтетін уақытты ертерек хабарладым.
 
Сондықтан Құрылтайдың алғашқы сайлау науқаны мазмұнды, ашық, бәсекеге толы әрі өркениетті сипатта өтті. Ел азаматтарының сайлау туралы пікірі осындай болды.
 
Бұл сайлау ел тарихындағы ең тартысты науқандардың бірі ретінде есте қалатыны анық. Партиялар сайлаушылармен кездесу кезінде, сондай-ақ ақпараттағы үгіт-насихат, жалпыұлттық теледебаттар, әлеуметтік желідегі пікірталастар барысында өз бағдарламаларын кеңінен әрі дәйекті түрде таныстырды.
 
Бір сөзбен, азаматтарымыз партиялардың ел болашағына қатысты ұстанымын мұқият зерделеуге мүмкіндік алды. Саяси ұйымдардың экономикадан бастап мәдениет саласына дейін қамтыған бастамаларын бағалап-бағамдады.

t.me/aqorda_resmi

ℹ️ Тыныштық күні: жалған ақпараттың сайлау туралы көзқарасыңызға ықпал етуіне жол бермеңіз

Құрылтай депутаттарының сайлауы алдындағы тыныштық күні қарсаңында Жалған ақпаратқа қарсы іс-қимыл орталығы аталған кезеңнің жалған әрі манипуляциялық ақпарат тарату мақсатында пайдаланылуы мүмкін екеніне назар аударады және ақпаратты тек сенімді дереккөздерден алудың маңыздылығын еске салады.

Соңғы апталарда сайлау процесіне қатысты жалған және манипуляциялық ақпарат таратуға бағытталған түрлі әрекеттер тіркелді. Бұл ретте танымал тұлғалардың атынан жасалған жалған аккаунттар мен мәлімдемелер, жасанды интеллект және дипфейк технологиялары арқылы дайындалған материалдар, сондай-ақ контекстен үзіп алынған фото, видео және аудиожазбалар кеңінен қолданылады.

Тыныштық күні және тікелей дауыс беру күні осындай сипаттағы жаңа материалдардың пайда болуын жоққа шығаруға болмайды. Атап айтқанда, орын алды делінген заңбұзушылықтар туралы хабарламалар, мемлекеттік органдардың жалған мәлімдемелері, саяси және қоғам қайраткерлерінің мүмкін емес уәделері, қойылымдық бейнероликтер, қолдан жасалған скриншоттар немесе осы ақпаратты дереу таратуға үндейтін эмоцияға құрылған жарияланымдар таратылуы мүмкін.

Жалған ақпаратты таратудың жекелеген тәсілдерінің бірі – оның жаппай таралғаны туралы әсер қалыптастыру. Бір мазмұндағы тезис бір мезгілде әртүрлі парақшаларда жарияланып, көптеген пікірлермен, репосттармен және басқа да жарияланымдармен қатар жүруі мүмкін. Алайда бірдей мазмұндағы хабарламалардың көптеп таралуы олардың шынайылығын өздігінен растамайды.

‼️ Есте сақтаңыз: ақпараттың таралу жылдамдығы оның шынайылығының дәлелі емес.

Сол себепті, тыныштық күні немесе дауыс беру күні сайлау барысындағы заңбұзушылықтар, дауыс беру нәтижелері немесе сайлау комиссияларының әрекеттері туралы резонанс тудырған хабарлама кездессе, асығыс қорытынды шығаруға және оны бөлісуге асықпаңыздар.

Ақпаратты бағалап, төмендегіні тексеріңіз:

🔺 жарияланым сізде күшті эмоция тудырып, дереу әрекет етуге итермелеуге тырыспай ма;

🔺 танымал тұлғаның жалған аккаунты немесе қолдан жасалған бейнесі пайдаланылмаған ба;

🔺 фото, видео немесе аудиожазба басқа жағдайдан не оқиғадан алынып, бастапқы контекстен ажыратылмаған ба;

🔺 ақпарат ресми ресурстарда расталған ба.

Егер ақпарат көзін және материалдың шығу тегін анықтау мүмкін болмаса, оны әрі қарай таратпаған жөн.

Сондай-ақ күмәнді ақпаратты чаттарға жаппай бөлісу, әлеуметтік желілерде жариялау немесе оған назар аударуға шақыру арқылы өз бетінше «тексеруге» болмайды. Хабарламада «тексеріңіз», «шұғыл таратыңыз» немесе «мұны жасырып отыр» деген сөздердің болуы ақпараттың шынайылығын дәлелдемейді.

Құқықтық салдарды да ескерген жөн. Көрінеу жалған ақпаратты тарату оның мазмұны мен нақты жағдайларға байланысты Қазақстан Республикасының заңнамасына сәйкес жауапкершілікке әкеп соғуы мүмкін.

Тыныштық күні – бұл заңнамада белгіленген үгіт жұмыстарын аяқтауға арналған уақыт қана емес. Ол – ел өміріндегі маңызды оқиға қарсаңында ақпаратты сабырлы әрі байыпты қабылдап, эмоцияға негізделген ақпараттық ықпалдың өз көзқарасыңызға әсер етуіне жол бермеуге мүмкіндік беретін кезең.

https://t.me/JAQortcomkz/264

Цифрландыру дәуірі өз талаптарын қойып отыр. Сондықтан Қазақстан Конституциясында алғаш рет цифрлық құқықтарға қатысты нормалар бекітілді. Олар азаматтардың дербес деректерін қорғауға және виртуалды кеңістіктегі жеке өміріне қол сұқпаушылықты қамтамасыз етеді.

Сонымен қатар дербес деректерді өңдеу, жою және қорғаудың нақты тәртібі заңмен айқындалады.

Егер бұрынғы Конституцияда хат алмасу және өзге де хабарламалардың құпиялылығы қорғалса, енді Негізгі заңға сәйкес цифрлық коммуникациялардың құпиялылығына кепілдік беріледі. Яғни мессенджерлердегі хаттар мен электрондық пошта арқылы жіберілген хабарламалар да қорғалады.