Month: October 2026 (Page 24 of 37)

Қазақстанда интернет-алаяқтық деректері 40 пайызға азайды

Қазақстанда интернет-алаяқтық деректері 40 пайызға азайды

Қазақстанда киберқылмысқа қарсы күрес және азаматтардың дербес деректерін қорғау бағытындағы жұмыстар күшейтілді. Соңғы үш жылда елдегі интернет-алаяқтық деректері 40 пайызға азайып, мұндай қылмыстардың ашылу көрсеткіші 29,9 пайызға артқан.

Киберқылмыстың алдын алуда Ұлттық антифрод-орталық маңызды рөл атқарады. 2024 жылғы шілдеден бастап жұмыс істеп келе жатқан орталық банктерді, мемлекеттік және құқық қорғау органдарын, төлем ұйымдары мен байланыс операторларын біріктіреді. Қазіргі уақытта жүйеге 200-ден астам ұйым қатысады. Бұл күдікті қаржылық операцияларды жедел анықтауға, алаяқтық жолмен алынған қаражатты бұғаттауға және қылмыстарды тергеу уақытын қысқартуға мүмкіндік береді.

Ішкі істер министрлігінің мәліметінше, 2026 жылдың сегіз айында Қазақстанда 14 414 интернет-алаяқтық дерегі тіркелген. Бұл өткен жылдың сәйкес кезеңімен салыстырғанда 13 пайызға аз. Осы уақыт аралығында 3 977 қылмыс ашылып, 1 128 адам жауапкершілікке тартылған. Жәбірленушілерге 5,9 млрд теңге өтелген.

Сонымен қатар азаматтардың дербес деректерін қорғауға қойылатын талаптар күшейтілуде. Ақпараттық қауіпсіздік саласындағы бақылау шаралары жетілдіріліп, мемлекеттік органдар мен ұйымдардың қызметкерлеріне киберқауіпсіздік бойынша оқыту жүргізу көзделген.

Азаматтардың өз деректерін қорғауына арналған тегін цифрлық қызметтер де қолжетімді. eGov.kz порталы мен eGov Mobile қосымшасындағы «Стоп-кредит» сервисі арқылы несие алуға ерікті түрде тыйым салуға болады. Ал NomadGuard платформасы деректердің ықтимал таралуын және фишингтік сілтемелерді анықтауға көмектеседі.

Мамандар азаматтарға SMS арқылы келетін растау кодтарын, құпиясөздерді және банк картасының деректерін бөгде адамдарға бермеуге, күмәнді сілтемелерге өтпеуге, әр сервиске жеке күрделі құпиясөз орнатып, екі факторлы аутентификацияны пайдалануға кеңес береді.

Киберқылмыспен тиімді күресу үшін заманауи технологияларды енгізу, заңнамалық талаптарды күшейту және халықтың цифрлық сауаттылығын арттыру маңызды. Бұл шаралар азаматтардың қаржылық қауіпсіздігін қамтамасыз етуге және интернет-алаяқтық тәуекелдерін төмендетуге бағытталған.

Дереккөз: Қазақстан Республикасы Премьер-министрінің ресми ақпараттық ресурсы.

Ресми сайт: https://primeminister.kz/

Ақмола облысында жасөспірімдер арасындағы құқық бұзушылықтың алдын алу және балалардың қауіпсіздігі мәселелері талқыланды

Ақмола облысында жасөспірімдер арасындағы құқық бұзушылықтың алдын алу және балалардың қауіпсіздігі мәселелері талқыланды

Ақмола облысында жасөспірімдер арасындағы құқық бұзушылықтың алдын алу және балалардың қауіпсіздігін қамтамасыз ету мәселелеріне арналған ведомствоаралық жұмыс кеңесі өтті.

Жиынға ҚР ІІМ Әкімшілік полиция комитеті төрағасының орынбасары, полиция полковнигі Куралай Карина, Құрылтай депутаты Лариса Ли, Ақмола облысы әкімінің орынбасары Досулан Айтбаев, мемлекеттік органдардың өкілдері, мектептер мен колледждердің директорлары және олардың тәрбие жұмысы жөніндегі орынбасарлары қатысты.

Куралай Карина өз сөзінде барлық мүдделі ведомстволардың күш-жігерін біріктірудің маңыздылығына тоқталды. Оның айтуынша, мұндай форматтағы ведомствоаралық кеңес алғаш рет өткізіліп отыр. Бұл бастама алдағы уақытта еліміздің басқа өңірлерінде де осындай кездесулер ұйымдастыруға негіз болмақ.

Жиында жеке профилактикалық жұмысты жетілдіру мәселесіне ерекше назар аударылды. Қоғамдық қауіпсіздік басқармасының бастығы Ерболат Хусаинов тәуекел тобындағы жасөспірімдерді дер кезінде анықтап, олармен мақсатты тәрбие жұмыстарын жүргізудің маңызын атап өтті. Оның айтуынша, кәмелетке толмағандардың қатысуымен болған әрбір оқиғаны талдау кезінде тек оқиғаның өзін ғана емес, оған себеп болған мән-жайларды да жан-жақты зерделеу қажет.

«Заң мен тәртіп» қағидатын іске асыру аясында жас ұрпақтың құқықтық мәдениетін қалыптастыруға, заңға құрметпен қарауға және өз әрекеттеріне жауапкершілікпен қарау дағдыларын дамытуға ерекше мән беріледі. Бұл бағытта мемлекеттік органдар мен білім беру ұйымдарының өзара іс-қимылы, сондай-ақ құқық бұзушылықтардың алдын алу шаралары маңызды рөл атқарады.

Кеңесте балалардың жолдағы қауіпсіздігі мәселесі де көтерілді. Әкімшілік полиция басқармасының бастығы Ержан Кошқарбаевтың мәліметінше, жыл басынан бері өңір жолдарында жеті бала қаза тапқан.

Білім беру ұйымдарының маңындағы қауіпсіздікті арттыру мақсатында полиция қызметкерлері 520-дан астам тексеру жүргізіп, шамамен 2 450 жол белгісін және 148 жасанды жол кедергісін орнатқан. Сонымен қатар 300-ден астам жол таңбасы сызылған.

Профилактикалық жұмысты күшейту мақсатында Полиция департаменті білім беру ұйымдарының басшылары мен педагогтеріне арналған арнайы оқу бейнематериалын әзірледі. Куралай Карина бұл бастаманы қолдап, материалды өңірлік және республикалық деңгейде кеңінен таратуды тапсырды.

Кездесу қорытындысы бойынша қатысушылар жасөспірімдер арасындағы құқық бұзушылықтың алдын алу және балалардың қауіпсіздігін қамтамасыз ету барлық мүдделі тараптардың жүйелі әрі үйлесімді жұмысын талап ететінін атап өтті. Балалардың құқықтарын қорғау, олардың қауіпсіз ортасын қалыптастыру және заңға құрметпен қарауға тәрбиелеу – ортақ міндет.

Көкшетауда зорлық-зомбылықтан зардап шеккендерге көмек көрсетуге бағытталған PANA жобасы таныстырылды

Көкшетауда зорлық-зомбылықтан зардап шеккендерге көмек көрсетуге бағытталған PANA жобасы таныстырылды

Ақмола облысында зорлық-зомбылықтың кез келген түрінен зардап шеккен адамдарға шұғыл көмек көрсетуге бағытталған PANA жобасы таныстырылды. Жоба аясында көмекке мұқтаж азаматтар полиция қызметкерлері келгенге дейін қауіпсіз жерде болып, алғашқы қолдау ала алатын арнайы пункттер құру жоспарланып отыр.

Жобаның таныстырылымы Көкшетау қаласындағы «Достар» мәдениет үйінде өтті. Бастаманың мақсаты, жұмыс істеу тетіктері мен ерекшеліктері туралы Құрылтай депутаты Лариса Ли баяндады.

Жобаның басты мақсаты — қауіпті жағдайға тап болған әрбір адамға шұғыл көмектің қолжетімді болуын қамтамасыз ету. Уақытылы көрсетілген қолдау қайғылы жағдайлардың алдын алуға, ауыр жарақат алу қаупін азайтуға және зардап шеккен адамның одан әрі зорлық-зомбылыққа ұшырамауына ықпал етеді.

PANA жобасы аясында әлеуметтік жауапкершілікті ұстанатын кәсіпкерлердің қолдауымен қауіпсіздік пункттерін ашу көзделген. Мұндай пункттер қолданыстағы жеке кәсіпкерлік нысандарының, дәріханалардың, сондай-ақ КСК мен ОСИ ғимараттарының базасында ұйымдастырылуы мүмкін. Кәсіпкерлер жобаға ерікті түрде қатыса алады.

Бастамаға қосылған нысандардың қызметкерлеріне арнайы оқыту жүргізіледі. Оқыту барысында көмек сұрап келген адамға қандай әрекеттер жасау керектігі, оның қауіпсіздігін қамтамасыз ету жолдары және жанжалға қатысушылармен өзара әрекеттесу тәртібі түсіндіріледі.

Көмекке жүгінген жағдайда пункт қызметкерлері дереу полиция шақырады. Құқық қорғау органдары келгенге дейін зардап шеккен адам қауіпсіздеу ортада болып, алғашқы қолдау ала алады.

PANA жобасын алғаш рет Ақмола облысында енгізу жоспарланып отыр. Алдағы уақытта бастаманы еліміздің басқа өңірлеріне де тарату көзделген. Қауіпсіздік пункттерін арнайы тамшы бейнесіндегі белгі арқылы тануға болады. Сонымен қатар QR-код арқылы жоба туралы қосымша ақпарат алуға мүмкіндік беріледі.

Бастаманы полиция қызметкерлері де қолдады. Олардың айтуынша, мұндай пункттер азаматтарды қорғау жүйесін толықтырып, адамдардың өмірі мен денсаулығына қауіп төнген жағдайларға жедел әрекет етуге мүмкіндік береді.

Ақмола облысында зорлық-зомбылықтың алдын алу, құқық бұзушылықтарды болдырмау және азаматтардың құқықтарын қорғау бағытындағы жұмыстар жалғасуда. Бұл ретте құқық бұзушылықтарға уақытылы ден қоюмен қатар, зардап шеккен адамдардың көмек сұраудан қорықпауына жағдай жасау да маңызды.

PANA жобасы қоғамдық қауіпсіздікті нығайтуға және құқық бұзушылықтардың алдын алуға бағытталған. «Заң мен тәртіп» қағидаты аясында әрбір азаматтың қорғалуына, көмекке уақтылы қол жеткізуіне және құқық қорғау органдарының жедел әрекет етуіне мүмкіндік беретін қолжетімді қолдау жүйесін қалыптастырудың маңызы зор.

🇰🇿🇧🇪Мемлекет басшысы Бельгиялықтар Королімен және Патшайымымен бірге Ұлттық балаларды оңалту орталығына барды

🇰🇿🇧🇪Мемлекет басшысы Бельгиялықтар Королімен және Патшайымымен бірге Ұлттық балаларды оңалту орталығына барды
 
🔹Президент Қасым-Жомарт Тоқаев Король Филипп және Патшайым Матильдамен бірге Астанадағы Ұлттық балаларды оңалту орталығын аралап көрді.
 
🔹Мәртебелі меймандар дамуында ауытқуы бар балаларға кешенді көмек көрсету тәртібімен танысты.

🔹Бельгия Королі мен Патшайымына ерекше қажеттіліктері бар балалардың коммуникативтік дағдыларын, таным-түйсігін және өз бетінше әрекет ету қабілетін шыңдауға бағытталған медициналық, психологиялық-педагогикалық оңалтудың және әлеуметтік бейімдеудің заманауи әдістері туралы баяндалды.

🔹Жеке қалпына келтіру бағдарламаларында роботтандырылған реабилитация технологиясы да қолданылады.
 
🔹Орталық жұмысында әлеуметтік интеграцияға және балалардың қоғам тіршілігінен тыс қалмай, толыққанды өмір сүруіне жағдай жасауға айрықша мән беріледі.
 
🔹Король Филипп пен Патшайым Матильда балалармен, олардың ата-аналарымен және медицина қызметкерлерімен әңгімелесіп, интерактивті бағдарламаға қатысты.
 
🔹Бұдан кейін меймандар Құрметті қонақтар кітабына естелік жазба қалдырды.
 
🔹 Ұлттық балаларды оңалту орталығы психоневрологиялық дертке шалдыққан, сөйлеуінде, когнитивті дамуында және мінез-құлқында бұзылыстары бар, соның ішінде церебралды сал аурына душар болған және аутистік спектрі бұзылған балаларға кешенді көмек ұсынады.

🔹Жыл сайын Қазақстанның барлық аймағынан 5 мыңнан астам пациентке оңалту қызметтері көрсетіледі.

Көкшетауда «ROAD TO ASTANA 2027» эстафетасы аясында спорт фестивалі өтті

Көкшетауда «ROAD TO ASTANA 2027» эстафетасы аясында спорт фестивалі өтті

Көкшетауда 2027 жылы Астанада өтетін үстел теннисінен әлем чемпионатына
арналған «ROAD TO ASTANA 2027» ұлттық жобасының екінші кезеңі ұйымдастырылды.
«Kokshe Arena» спорт кешенінде халықаралық жарыстың ресми туы таныстырылып, қала
тұрғындары мен қонақтарына арналған спорт фестивалі өтті.
Фестиваль алаңында үстел теннисін ойнауға арналған орындар, интерактивті
ойындар, фотозоналар мен жергілікті өндірушілердің жәрмеңкесі жұмыс істеді.
Қолөнершілер мен өңір креаторларының көрмесінде авторлық бұйымдар мен
шығармашылық жұмыстар ұсынылды. Келушілер шеберлердің еңбегімен танысып, олардың
өнімдерін тамашалады.
Іс-шараның негізгі бөлімінде Халықаралық үстел теннисі федерациясының (ITTF)
ресми туы салтанатты түрде таныстырылды. Оны республикалық жарыстардың бірнеше
дүркін чемпионы әрі жүлдегері Меруерт Тәжімова мен үстел теннисінен Ақмола облысының
чемпионы Мансұр Құжынтаев алып шықты.
Салтанатты рәсімге Ақмола облысы әкімінің орынбасары Досұлан Айтбаев қатысып,
өңірдің «ROAD TO ASTANA 2027» ұлттық эстафетасын қабылдауына куә болды.
Спорттық бағдарлама жас теннисшілердің көрсетілім ойындарымен, командалық
жарыстармен және шапшаңдық пен дәлдікке арналған сайыстармен жалғасты. Қатысушылар
үстел теннисінен бақ сынап, түрлі ойындар мен спорттық флешмобқа қатысты.
Қазақстан ұлттық құрамасының жаттықтырушысы Геннадий Герасименко жас
спортшыларға шеберлік сабағын өткізді. Олимпиада ойындарына қатысқан теннисшілерді
тәрбиелеген маман қатысушылармен кәсіби тәжірибесін бөлісті.
Мәдени бағдарламада «Көкшетау» халық би ансамблі, «КамАлия» спорттық-бал биі
клубының бишілері Мәди Аманжол мен Кристина Ваганова, «Достар» мәдениет сарайының
әншісі Дариға Исмағұлова және «Шамшырақ» ансамблінің квартеті өнер көрсетті.
«ROAD TO ASTANA 2027» жобасының басты нышаны саналатын ресми ту
Қазақстанға Лондоннан жеткізілді. Еліміз оны 2026 жылы өткен әлем чемпионатында келесі
біріншілікті қабылдайтын мемлекет ретінде алды. Қазақстандағы эстафета Өскеменнен
басталып, Көкшетауда жалғасты.
Жоба аясында Бурабай курорттық аймағында да бейнетүсірілім жүргізілді. Әлем
чемпионатының туы Ақмола облысының табиғи көрікті жерлерінде түсіріліп, бұл кадрлар
халықаралық аудиторияға арналған бейнероликтер топтамасына енгізіледі.
Эстафетаның келесі аялдамасы – Ақтөбе қаласы. Мұнда да ресми туды таныстыру
рәсімі мен үстел теннисі фестивалі өтеді. Ұлттық жоба еліміздің шығыс, солтүстік, батыс
және оңтүстік өңірлерін қамтып, Астанада мәресіне жетеді.
2027 жылғы 22–30 мамырда Астанада Орталық Азия тарихында алғаш рет үстел
теннисінен әлем чемпионаты өтеді.

🇧🇪Бельгиялықтар Королі Филипп қонақжайлық танытқаны үшін Мемлекет басшысына алғыс айтып бұған дейін Тақ мұрагері ретінде Қазақстанға жасаған сапарларын еске алды

🇧🇪Бельгиялықтар Королі Филипп қонақжайлық танытқаны үшін Мемлекет басшысына алғыс айтып, бұған дейін Тақ мұрагері ретінде Қазақстанға жасаған сапарларын еске алды

– Сіздің басшылығыңызбен еліңіз дамудың даңғыл жолына түскеніне ерекше әсерлендік. Сапар кезінде танысу жоспарланған жасанды интеллект, энергетика, атом энергиясы салалары екі ел үшін өте маңызды. Ғалымдардың дөңгелек үстелдегі пікірталасына куә боламыз. Бізбен бірге университеттердің ректорларынан, компания өкілдерінен тұратын үлкен делегация келді, – деді Король Филипп.

🔹Сондай-ақ келіссөз барысында екі елдің ресми делегация мүшелері сөз сөйледі.

🔹Тараптар кездесу соңында көптеген бастама көтерілгеніне көңіл толатынын атап өтіп, іс жүзіндегі ынтымақтастықты одан әрі өрбітуге дайын екенін растады.

Қасым-Жомарт Тоқаев Қазақстан Бельгияны Еуропадағы уақыт тезінен өткен сенімді серіктесі ретінде қарастыратынын атап өтті

Қасым-Жомарт Тоқаев Қазақстан Бельгияны Еуропадағы уақыт тезінен өткен сенімді серіктесі ретінде қарастыратынын атап өтті

– Келесі жылы мемлекеттеріміздің арасында дипломатиялық қарым-қатынас орнағанына 35 жыл толады. Сапарыңыз осы айтулы меженің дайындығына тың серпін береді және ынтымақтастығымызды нақты нәтижелермен толықтыра түседі. Бельгия Қазақстанның жетекші сауда серіктестерінің қатарына кіреді. Сонымен қатар еліңіз Қазақстан экономикасына қаржы құйған ең ірі он инвестордың бірі саналады. Мұны Қазақстан экономикасының келешегіне деген сенімнің айқын көрінісі деп бағалаймын, – деді Президент.

🔹Мемлекет басшысы Қазақстан мен Бельгия арасында көлік-логистика, аса маңызды минералдар, жаңартылатын қуат көздері, ауыл шаруашылығы, денсаулық сақтау және жасанды интеллект салалары бойынша өзара ықпалдастықты кеңейтуге мол мүмкіндік бар екеніне назар аударды.

– Сізбен бірге келген мемлекеттік органдардың, өңірлік билік пен іскер топтардың өкілдеріне, танымал ғалымдар мен журналистерге ілтипат білдіремін. Ертең Қазақстан – Бельгия іскерлік кеңесінің төртінші отырысын өткіземіз. Бұл бастаманың мүмкіндіктерімізді іске асырып, орнықты нәтижеге қол жеткізетін тиімді алаңға айналғаны қуантады. Сондай-ақ Бельгиямен Еуропалық одақ және басқа да көпжақты құрылымдар аясындағы ықпалдастығымызды жоғары бағалаймыз. Жаһанда тұрақсыздық белең алған кезеңде сенім, құрмет пен өзара түсіністік қағидаттарын арқау еткен іскерлік байланыстардың маңызы арта түседі. Қарым-қатынасымыздың зор әлеуетіне сенемін. Сапар аясындағы уағдаластықтарды толық іске асыруға барынша күш саламын, – деді Қасым-Жомарт Тоқаев.

🇰🇿🇧🇪Қасым-Жомарт Тоқаев Бельгиялықтар Королімен және Патшайымымен кеңейтілген құрамда келіссөз жүргізді

🇰🇿🇧🇪Қасым-Жомарт Тоқаев Бельгиялықтар Королімен және Патшайымымен кеңейтілген құрамда келіссөз жүргізді
 
🔹Ақордада өткен келіссөз барысында Президент Қазақстан мен Орталық Азияға тарихта тұңғыш рет мемлекеттік сапармен келген Бельгиялықтар Короліне және Патшайымына ілтипат білдірді.

– Осы тарихи сәтте Сіздермен жүздесіп, мемлекеттеріміз арасындағы берік достықты атап өту – мен үшін зор мәртебе. Аса мәртебелі Король Филипп, халқыңызға қалтқысыз қызметіңізді жоғары бағалаймыз. Cіз Корольдік билігіне келгелі еліңіз өркендеп, әлемдік аренадағы лайықты орнын бекіте түсті. Халқыңызға адалдығыңыз және Бельгияны мекендейтін түрлі қауымдар арасындағы өзара түсіністікті нығайту жолындағы табанды еңбегіңіз Тәждің ел бірлігін сақтаудағы рөлін айқындай түседі. Біз де «Бірлігіміз – әралуандықта» деген қағидатқа айрықша мән береміз. Әрбір азаматтың келешегімізге атсалысқанын қалаймыз. Көп жылдан бері кәсіпкерлікті, білім мен инновацияны дамытуға ерекше күш салып келесіз. Бұл – шын мәнінде үлгі тұтарлық ізгі істер. Король әулетінің Бельгия бизнесіне ұдайы қолдау көрсетуі шексіз құрметке лайық. Аса мәртебелі Патшайым Матильда, Сіз бұл сапардың мән-мазмұнын арттырып, шырайын келтірдіңіз. Сіздің балаларды қорғау, білім беру, адамның қадір-қасиетін құрметтеу мәселелеріне келгенде, ерекше жанашырлығыңыз бен қамқорлығыңызға тәнтіміз. Бұл игі мұраттар азаматтарымызды шын мәнінде сүйсінтеді, – деді Мемлекет басшысы.

🇧🇪Король Филипп пен Патшайым Матильда қонақжайлығы және сый-құрметі үшін Қазақстан Президентіне шынайы ризашылығын білдірді

🇧🇪Король Филипп пен Патшайым Матильда қонақжайлығы және сый-құрметі үшін Қазақстан Президентіне шынайы ризашылығын білдірді

✔️Олар еліміздің әлеуметтік-экономикалық табыстарына және халықаралық аренадағы биік абырой-беделіне арнайы тоқталды.

– Қазақстан – біз үшін қарқынды дамып келе жатқан өте маңызды ел. Жалпы, Бельгия тұтас Орталық Азия өңіріне айрықша қызығушылықпен қарайды. Бұл өңірдің мәні зор. Менімен бірге үлкен делегация келді. Әлбетте, біз бір-бірімізді өте жақсы білеміз. Елдеріміз 35 жыл ішінде жақсы қарым-қатынас орнатты. Біз осы тарихи межені бірге атап өтуге ниеттіміз. Сонымен қатар ынтымақтастығымызды жаңа сапалы деңгейге көтеретінімізге сенімдімін. Менімен бірге келген делегация құрамына келешекке бағдарланған түрлі саланың өкілдері кірді. Президент мырза, бізбен бірге жүру үшін жұмыс кестеңізді өзгерткеніңізді білемін. Осы ықыласыңызға тәнтіміз. Сондықтан алтын уақытыңызды бөліп, құрмет көрсеткеніңізді жоғары бағалаймыз, – деді Бельгиялықтар Королі Филипп.

🇰🇿🇧🇪Қазақстан Президенті Бельгиялықтар Королімен және Патшайымымен шағын құрамда келіссөз жүргізді

🇰🇿🇧🇪Қазақстан Президенті Бельгиялықтар Королімен және Патшайымымен шағын құрамда келіссөз жүргізді
 
✔️Келіссөз барысында Президент Бельгиялықтар Королі мен Патшайымының Қазақстанға жасаған алғашқы мемлекеттік сапары екіжақты серіктестіктің жаңа кезеңіне жол ашатын тарихи уақиға екенін атап өтті.
 
– Сізді Астанада қарсы алғаныма қуаныштымын. Бұл – мен үшін зор мәртебе. Тарихи сапарыңыз жұртшылықтың үлкен қызығушылығын тудырды. Қазақстанға келген делегация құрамына Үкімет пен аймақтық билік, іскерлік топтар, академиялық қауымдастық және бұқаралық ақпарат құралдары өкілдері енген. Сіз Тақ мұрагері ретінде Қазақстанға үш мәрте келген едіңіз. Елімізбен қарым-қатынасты дамыту жөніндегі ниетіңізді жоғары бағалаймыз. Сіздің қолдауыңызды әрдайым сезінеміз, – деді Қасым-Жомарт Тоқаев.
 
✔️Қасым-Жомарт Тоқаев Бельгияны Қазақстанның Еуропадағы уақыт сынынан өткен сенімді серіктесі деп санайтынын жеткізді.

– Келесі жылы елдеріміздің арасында дипломатиялық қарым-қатынас орнағанына 35 жыл толады. Осы жылдарда шынайы достық пен өзара құрметке негізделген тығыз қарым-қатынасты жолға қойдық. Үздіксіз саяси диалог ынтымақтастығымыздың берік тұғыры іспеттес. Біз жетістіктеріңізді ұдайы қарап отырамыз. Бұл шын мәнінде таңғалдырады. Сіздерден үлгі алып, тәжірибелеріңізді үйренуіміз қажет. Бельгияға бес жыл бұрын жасаған сапар барысындағы мазмұнды келіссөздерді ықыласпен еске аламын. Биыл маусым айында Бельгияға барған сапарымда Премьер-министр Барт де Вевермен келіссөз жүргізіп, серіктестікті нығайтуға қос тарап та бейіл екенін растадық, – деді Мемлекет басшысы.

« Older posts Newer posts »

© 2026 ЗЕРЕН

Theme by Anders Noren — Up ↑