Орталық Азия және Әзербайжан мемлекеттері басшыларының VIIІ Консультативтік кездесуі
📍Түрікменстан, Аваза
Орталық Азия және Әзербайжан мемлекеттері басшыларының VIIІ Консультативтік кездесуі
📍Түрікменстан, Аваза
Президент волонтерлік қозғалыс гуманитарлық ықпалдастықтың құрамдас бөлігі болуы керек деп пайымдайды
– Еліміздің «Таза Қазақстан» жалпыхалықтық жобасын іске асырудағы тәжірибесін аймақтық деңгейде қолға алуға болады. Бұл бастама жастарды адамгершілік және азаматтық құндылықтарға баулиды. Сондықтан келесі жылы «Орталық Азия – ізгі істер мекені» деген ұранмен волонтерлік мәселесіне қатысты жастар форумын өткізуді ұсынамын. Аймақтағы ішкі туризмнің дамуы арқылы халықтардың бір-бірімен араласуына, елдеріміздің тарихымен және мәдениетімен танысуға жол ашылды. Біз Орталық Азия мен Әзербайжандағы ауқымды мәдени, ғылыми, спорттық және туристік іс-шараларының бірыңғай күнтізбесін жасауды ұсынамыз. Бұл барыс-келісті арттырып, бірлескен турлар аясында шетелдік туристерді көптеп тартуға мүмкіндік береді. Жоғарыда айтылған ұсыныстар өңірдегі ынтымақтастықтың берік гуманитарлық тұғырын қалыптастырады, – деді Қасым-Жомарт Тоқаев.
🔹Мемлекет басшысы сөз соңында Консультативтік кездесулерді жетілдіру мәселесін қозғады.
– Меніңше, осы ынтымақтастық форматын таптаурын қалыптан ада, көшбасшылардың тікелей диалог алаңы ретінде сақтау маңызды. Бұдан бөлек, жұмыс тиімділігі ұсыныстар мен бастамалардың санымен емес, олардың іс жүзіндегі құндылығымен, нәтижесімен өлшенуі керек деп санаймын. 2018 жылдан бері 200-ден астам бастама көтерілген. Дегенмен оның аз ғана бөлігі іске асты. Мұны бұлтартпас деректер айғақтайды. Осы орайда, сыртқы саясат ведомстволары аймақтық бастамаларды түгендеп, олардың өзектілігі мен перспективасын анықтағаны жөн. Бұл аталған форматтың тиімділігін арттырып, қол жеткізілген уағдаластықтарды жүзеге асыруға ықпал етеді, – деді Қазақстан Президенті.

Мемлекет басшысы дүрбелеңге толы дүниеде аймақтағы бейбітшілік пен тұрақтылықты сақтау басты міндет екенін айтты
– Терроризм, есірткі бизнесі, қару-жарақ және адам саудасы, заңсыз көші-қон, ұйымдасқан қылмыс пен алаяқтық қауіпсіздікке айтарлықтай қатер төндіреді. Цифрлық технологиялардың қаскөйлердің, атап айтқанда, лаңкестер мен есірткі сататын қылмыстық топтардың қолына түсу қаупі қатты алаңдатады. Әрине, оған қарсы тұратын тәсілдеріміз заманға сай болуы керек. Осы саладағы ынтымақтастықты нығайтуға Орталық Азия елдері қауіпсіздік кеңесі хатшыларының тұрақты кездесулері айтарлықтай үлес қосуда. Үшінші кездесу 23-24 сәуір күндері Душанбеде өтті. Былтыр Ташкентте қабылданған Аймақтық қауіпсіздік және тұрақтылық тұжырымдамасын, сондай-ақ Қауіпсіздік тәуекелдері және оның алдын алу шараларының тізбесін жоғары бағалаймыз. Мұны барлық тараптың мүлтіксіз орындауы маңызды, – деді Президент.
🔹Қасым-Жомарт Тоқаев мәдени-гуманитарлық қарым-қатынасты тереңдетуге баса назар аударды. Президент аймақ елдерін бай тарихи-мәдени мұра біріктіретінін айтты.
– Соңғы жылдары мәдени байланыстарымыз айтарлықтай жандана түсті. Көрмелер, кинофестивальдер, форумдар, еске алу кештері өткізіліп жатыр. Жастардың, жоғары оқу орындарының және ғылыми қауымдастықтың арасындағы қарым-қатынас, шығармашылық қауымның тікелей диалогы арқылы осы үрдіске тың серпін беру керек. Бірыңғай ақпараттық кеңістікті қалыптастыру ынтымақтастығымызды тереңдете түседі. Қазақстан отандық Silk Way телеарнасы жанынан аймақтық телеарна ашу туралы бастама көтерді, – деді Мемлекет басшысы.

Қасым-Жомарт Тоқаев жасанды интеллект саласындағы ынтымақтастықтың маңызына тоқталды
– Қазақстан жасанды интеллектінің біртұтас экожүйесін дәйекті түрде құра бастады. «Жасанды интеллект туралы» заң қабылданды. Digital Qazaqstan стратегиясы жүзеге асырылуда. Суперкомпьютер кластері іске қосылды. Alem.ai халықаралық орталығы жұмыс істеп тұр. Бұл тақырып өте өзекті. Осыны ескеріп, жасанды интеллект бойынша Орталық Азия серіктестігін құру мүмкіндігін қарастыруды ұсынамын. Оның аясында елдеріміздің ғылыми орталықтары, университеттері, технологиялық компаниялары ақпарат пен тәжірибе алмаса алады, – деді Мемлекет басшысы.
🔹Қазақстан Президенті нейрожелілерді қауіпсіз пайдалану маңызды деп санайды. Бұған қатысты қауіп-қатер халықаралық деңгейде қызу талқыланып жатыр.
– Меніңше, аса маңызды технологияларды бақылаудың бірлескен тәсілдерін әзірлеуге уақыт оздырмай кірісу керек. Осыны ескере отырып, Қазақстан Орталық Азия елдері мен Әзербайжанға жасанды интеллектіні жауапкершілікпен қолдану туралы декларация әзірлеуді ұсынды, – деді Қасым-Жомарт Тоқаев.

Президент Дүниежүзілік банктің бағалауынша, жоспарланған инфрақұрылымдық міндеттер толық жүзеге асырылса, 2040 жылға қарай Каспий арқылы жүк тасымалы төрт есе ұлғаятынын айтты
– Орта дәлізді TRIPP көлік бастамасымен ұштастыру мәселесін сарапшылар деңгейінде талқылауға болады деп ойлаймын. Бұл жоба әлеуетімізді арттырады әрі барлық мемлекеттің ұзақмерзімді мүддесіне сай келеді, – деді Қасым-Жомарт Тоқаев.
🔹Президенттің пікірінше, су проблематикасы – Орталық Азия тұрақтылығына қатер төндіретін басты сынақтардың бірі.
– Алдымызда трансшекаралық су ресурстарын басқарудың тың тәсілдерін әзірлеу міндеті тұр. Бұл жұмыста өзара құрмет, теңқұқылық қағидаттары негізге алынып, аймақтағы барлық елдің мүддесі ескерілуі керек. Орталық Азияның су пайдалану бойынша негіздемелік конвенциясын қабылдау ынтымақтастықтың жаңа өңірлік архитектурасын қалыптастыратын алғашқы қадам болар еді. Құжат жобасы тараптардың қарауына ұсынылды. БҰҰ аясында Халықаралық су ұйымын құру бастамасы өте өзекті. Оны халықаралық, атап айтқанда, Орталық Азияның ортақ ұстанымы ретінде бірге ілгерілету су ресурстарын басқарудың жаһандық жүйесіне қосқан үлесіміз болмақ, – деді Президент.

Президент Орталық Азия және Әзербайжан мемлекеттері басшыларының VIIІ Консультативтік кездесуіне қатысты
🔹Қасым-Жомарт Тоқаев Әзербайжан мен Орталық Азия елдері Тәуелсіздігінің 35 жылдығымен тұспа-тұс келген бүгінгі отырыстың символдық мәні ерекше екенін атап өтті.
– Осы жылдар ішінде тұтас дәуірді қамтыған ұзақ әрі сындарлы, сонымен қатар жемісті жолды еңсердік. Егемендігімізді нығайтып, дамудың төл моделін қалыптастырдық. Халықаралық қоғамдастықта лайықты орынға ие болдық. Бүгінде Орталық Азия мен Әзербайжан Еуразиядағы өсіп-өркендеп келе жатқан геосаяси ықпалдастық орталығы саналады. Ең бастысы, бауырлас халықтарымыздың парасаты мен ынтымақ-бірлігінің арқасында бейбітшілік пен келісім орнаған қоғамда өмір сүріп жатырмыз. Ауызбіршілік, өзара қолдау мен сенім осы заманның сын-қатерлеріне төтеп беру үшін ортақ стратегиялық тірегімізге айналды. Бұл үрдістер геосаяси шиеленіс пен жікке бөліну күшейіп, халықаралық қатынастар құрылымы өзгеріске ұшыраған тұста өте өзекті, – деді Мемлекет басшысы.
🔹Президент Консультативтік кездесуге қатысушыларға өңірдегі ықпалдастықтың негізгі мәселелері бойынша Қазақстанның ұстанымын жеткізді.
– Бірлескен күш-жігердің арқасында сауда-экономикалық ынтымақтастығымыздың мазмұны жыл өткен сайын толығып келеді. Бірлескен кәсіпорындар саны көбейді, іскерлік байланыс нығая түсті. Өнеркәсіп, машина жасау, энергетика, ауыл шаруашылығы секілді секторларда ауқымды жобалар жүзеге асырылуда. Сауда кедергілері бірте-бірте жойылып, шекараларда жаңа өткізу бекеттері ашылып жатыр. Автокөлік және теміржол байланысы кеңейіп келеді. Дегенмен, біздің пайымдауымызша, ішкі нарық әлеуеті әлі де зор. Былтыр өңір ішіндегі сауда көлемі шамамен 13 миллиард долларды құрады. Бұл елдеріміздің жалпы тауар айналымының 8 пайызына жуық. Сондықтан үкіметтерімізге өзара сауда үлесін арттырып, осы көрсеткішті кемінде 20 миллиард долларға жеткізу үшін бірлескен іс-қимыл жоспарын әзірлеу және қабылдау жөнінде міндет жүктеген дұрыс, – деді Қасым-Жомарт Тоқаев.

Фейктердің жаңа толқыны: ІІІ тоқсанда не өзгерді?
Ақпараттық кеңістікте қандай тақырыптар трендте болды? Жалған ақпарат таратушылар бұл жолы қандай жаңа технологияларды қолданды?
Жалған ақпаратқа қарсы іс-қимыл орталығының жаңа бюллетенінде 2026 жылдың ІІІ тоқсанындағы басты өзгерістерді талдап шықты.








Президент Орталық Азия және Әзербайжан мемлекеттері басшыларының сегізінші Консультативтік кездесуіне қатысу үшін «Аваза» кешеніне барды
🇰🇿🇹🇲Қасым-Жомарт Тоқаевты Түрікменстан Президенті Сердар Бердімұхамедов күтіп алды.
🇰🇿🇹🇲Мемлекет басшысы Қасым-Жомарт Тоқаев жұмыс сапарымен Түрікменстанға барды
Қазақстан Президентін әуежайдан Түрікменстан Министрлер кабинеті Төрағасының орынбасары – Сыртқы істер министрі Рашид Мередов қарсы алды.

Ақмола облысында қылмыс деңгейі төмендеді
Ақмола облысында жедел ахуал тұрақты сақталып, қылмыс деңгейінің төмендеу үрдісі байқалады. Өңірлік полиция департаментінің 2026 жылдың үшінші тоқсанындағы жұмыс қорытындысы кеңейтілген кеңесте қаралды.
Жиынға Департамент басшылығы, аппарат қызметтерінің және аумақтық бөлімшелердің бастықтары, сондай-ақ жеке құрам қатысты.
Кеңесті ашқан Ақмола облысы Полиция департаментінің бастығы, полиция генерал-майоры Нұрсұлтан Мұқашев жыл басынан бері полиция бөлімшелері жедел ахуалды тұрақтандыру және «Заң мен тәртіп» қағидатын іске асыру бағытында ауқымды жұмыстар атқарғанын атап өтті.
Қылмыстың кең таралған жекелеген түрлері бойынша оң динамика қалыптасты. Атап айтқанда, тонау фактілері 51,5%-ға, мал ұрлығы 42,9%-ға, алаяқтық 17,5%-ға, интернет-алаяқтық 14,5%-ға төмендеді.
Қоғамдық қауіпсіздікті қамтамасыз етуде полицияның кешенді күштері мен патрульдік экипаждардың жұмысын күшейтудің де маңызы зор. Соның нәтижесінде қоғамдық орындар мен көшелерде жасалатын құқық бұзушылықтар саны азайды. Сонымен қатар кәмелетке толмағандар, алкогольдік масаң күйдегі адамдар, өтелмеген соттылығы бар тұлғалар тарапынан жасалатын және тұрмыстық сипаттағы қылмыстардың да төмендегені байқалады.
Кеңестің жұмыс бөліміне дейін қызметтік міндеттерін атқару кезінде ерекше көзге түскен жедел қызмет бөлімшелерінің қызметкерлерін марапаттау рәсімі өтті. Ішкі істер министрі, полиция генерал-лейтенанты Ержан Саденовтің бұйрығымен криминалдық полиция және есірткі қылмыстарына қарсы іс-қимыл бөлімшелерінің қызметкерлеріне ведомстволық наградалар табысталды.
Кеңес барысында жедел-қызметтік жұмыстың негізгі бағыттары бойынша Департамент бастығы орынбасарларының баяндамалары тыңдалды. Атап айтқанда, жедел, тергеу, әкімшілік қызмет, сондай-ақ жеке құраммен жұмыс жүргізу бағыттарының нәтижелері қаралды.
Анықталған кемшіліктер бойынша оларды жоюға бағытталған нақты шаралар белгіленді. Жұмысында олқылықтарға жол берген аумақтық бөлімшелердің қызмет нәтижелері жеке қаралып, олардың тиімділігін арттыруға бағытталған практикалық шешімдер қабылданды.
Кеңесте қызметтік тәртіп пен заңдылықты сақтау, сондай-ақ ішкі істер органдары қызметкерлері арасында сыбайлас жемқорлық көріністеріне жол бермеу мәселелеріне де ерекше назар аударылды.
Қазіргі жағдайда полиция қызметіне цифрлық технологияларды енгізу және оларды одан әрі жетілдіру де маңызды бағыттардың бірі болып қала береді. Осыған байланысты жедел басқарудың шағын орталықтарын ашу, жол және қоғамдық қауіпсіздікті қамтамасыз етуде автоматтандырылған жүйелерді пайдалану, бейнебақылау жүйелерін, әсіресе білім беру ұйымдарында кеңейту мәселелері қаралды.
Кеңес қорытындысын шығарған Нұрсұлтан Мұқашев жеке құрамды Мемлекет басшысы мен Ішкі істер министрлігі басшылығының тапсырмаларына сәйкес қызметтік міндеттерді сапалы әрі адал орындауға бағыттады.
Ағымдағы кезеңдегі басым міндеттердің қатарында құқық бұзушылықтардың алдын алу жұмыстарын күшейту, «Заң мен тәртіп – қауіпсіз балалық шақтың кепілі» бастамасы аясында балалардың құқықтары мен қауіпсіздігін қорғау, сондай-ақ халықтың цифрлық сауаттылығын арттыру бар.
Сонымен қатар жол қауіпсіздігін қамтамасыз ету, вандализмге және заңсыз граффити салуға қарсы іс-қимыл, түнгі көлік жарыстарының алдын алу, полиция қызметіне заманауи цифрлық шешімдерді енгізу, сондай-ақ қызметтік тәртіпті нығайту және қызметкерлер тарапынан заңдылықтың бұзылуына жол бермеу мәселелері де тұрақты бақылауда болады.

© 2026 ЗЕРЕН
Theme by Anders Noren — Up ↑