Month: October 2026 (Page 29 of 37)

Мас күйінде көлік жүргізу – жолдағы өмірге төнген қауіп

Мас күйінде көлік жүргізу – жолдағы өмірге төнген қауіп

Көлік құралын алкогольдік немесе есірткілік масаң күйде басқару – жол қозғалысы ережелерін өрескел бұзудың бірі. Мұндай жағдайда жүргізушінің жолдағы жағдайды дұрыс бағалауы мен жылдам шешім қабылдау қабілеті төмендейді. Ал бір сәттік қателіктің салдары адам өміріне қауіп төндіруі мүмкін.

Қазан айының басынан бері патрульдік полиция қызметкерлері көлік құралын масаң күйде басқарған 22 жүргізушіні анықтап, ұстады. Аталған құқық бұзушылықтар бойынша әкімшілік хаттамалар толтырылды.

Мұндай әрбір жағдай – адам өмірі мен денсаулығына төнген ықтимал қауіп. Мас күйінде көлік басқарған жүргізуші өз өміріне ғана емес, көліктегі жолаушылардың, жаяу жүргіншілердің және жол қозғалысына қатысушылардың қауіпсіздігіне қатер төндіреді.

Алкоголь ішкеннен кейін «аз ғана іштім», «көлік жүргізуге шамам жетеді» деп ойлау – үлкен қателік. Тіпті аз мөлшердегі алкогольдің өзі адамның зейініне, реакция жылдамдығына және жолдағы жағдайды дұрыс бағалау қабілетіне әсер етуі мүмкін.

Заң мен тәртіпті сақтау – ең алдымен әр адамның жеке жауапкершілігінен басталады.

Құрметті облыс тұрғындары мен қонақтары! Мас күйінде көлік тізгініне отырмаңыз. Егер ішімдік ішкен адамның көлік жүргізуге әрекет жасап жатқанын байқасаңыз, бейжай қарамай, оның көлік жүргізуіне жол бермеуге тырысыңыз.

Есте сақтаңыз: бірнеше минут үнемдеу үшін өзіңіздің және өзгенің өміріне қауіп төндірудің қажеті жоқ. Қажет болса, такси шақырыңыз немесе көлікті сау жүргізушіге сеніп тапсырыңыз.

Жол қозғалысы ережелерін сақтап, қауіпсіздікке жауапкершілікпен қараңыз. Өзіңіздің, жақындарыңыздың және жолдағы басқа да азаматтардың өмірін бағалаңыз.

Әр сапардың соңы – отбасыңызға аман-есен оралу болсын!

«Қауіпсіз үй»: Ақмола облысында «Заң және тәртіп» қағидаты аясында профилактикалық жұмыс күшейтілді

«Қауіпсіз үй»: Ақмола облысында «Заң және тәртіп» қағидаты аясында профилактикалық жұмыс күшейтілді

Ақмола облысында «Қауіпсіз үй» жедел-профилактикалық іс-шарасы басталды. «Заң және тәртіп» қағидатын қамтамасыз етуге бағытталған іс-шара аясында 5 қазаннан бастап полицейлер басқа қызметтердің өкілдерімен бірлесіп, есепте тұрған азаматтарға атаулы тексерулер жүргізіп, халықпен профилактикалық жұмысты күшейтуде.

Рейдтер өткізуге 360-тан астам адам тартылды. Мобильді топтардың құрамына жедел қызметтердің қызметкерлері, учаскелік полиция инспекторлары, көші-қон қызметінің, пробация қызметінің өкілдері, сондай-ақ қоғамдық көмекшілер мен еріктілер кірді.

Алғашқы күннің қорытындысы бойынша тұрғылықты жері бойынша 470-тен астам есепте тұрған азамат тексерілді. Олардың қатарында шартты түрде мерзімінен бұрын босатылған, бұрын сотталған, отбасылық-тұрмыстық құқық бұзушылықтар жасаған, алкогольді теріс пайдаланатын, сондай-ақ қолайсыз отбасылар ретінде профилактикалық есепте тұрған адамдар бар.

Полицейлер тексерілген азаматтардың әрқайсысымен профилактикалық әңгімелер өткізіп, заңнама талаптарын түсіндірді. Алғашқы күннің қорытындысы бойынша екі құқық бұзушыға қатысты шартты түрде мерзімінен бұрын босатудың күшін жою туралы өтініштер жолданды.

Рейдтер барысында көші-қон заңнамасының 17 бұзушылығы және шетел азаматтарының өңір аумағында заңсыз болуының 9 фактісі анықталды.

Профилактикалық жұмыс тек есепте тұрған адамдарға қатысты ғана жүргізілмейді. Полицейлер әкімшілік учаскелердің тұрғындарымен кездесіп, олардың сұрақтарына жауап беріп, жеке және қоғамдық қауіпсіздік шараларын түсіндіруде. Бірінші күні халықпен 57 кездесу өткізіліп, оған 500-ден астам ақмолалық қатысты.

Іс-шара аясында азаматтық қару иелеріне де ерекше көңіл бөлінеді. Полицейлер қаруды сақтау мен пайдаланудың белгіленген талаптарының сақталуын тексеруде.

«Қауіпсіз үй» жедел-профилактикалық іс-шарасы 5 қарашаға дейін жалғасады. Оның негізгі міндеті — құқық бұзушылықтарды уақтылы анықтау, қайталама құқық бұзушылықтардың алдын алу және азаматтардың қауіпсіздік деңгейін арттыру.

Іс-шара «Заң және тәртіп» қағидатын нығайтуға, құқықтық мәдениетті арттыруға және қоғамдағы қауіпсіздікті қамтамасыз етуге бағытталған.

Қызылорда, Маңғыстау және Ақтөбе облыстарын жалғайтын «Қызылорда-Сексеуіл-Ырғыз-Бейнеу» күре жолының құрылысы «e-Otinish»-ке келіп түскен өтініштерден соң қолға алынғанын біліп пе едіңіз?

Қызылорда, Маңғыстау және Ақтөбе облыстарын жалғайтын «Қызылорда-Сексеуіл-Ырғыз-Бейнеу» күре жолының құрылысы «e-Otinish»-ке келіп түскен өтініштерден соң қолға алынғанын біліп пе едіңіз?

Мемлекет басшысының тапсырмасымен «e-Otinish жүйесі іске қосылды.

2020 жылы жаңа Әкімшілік рәсімдік-процестік кодекс қабылданып, 2021 жылдың 1 шілдесінен бастап Мемлекет басшысының тапсырмасымен «e-Otinish жүйесі іске қосылды. Бұрын әр мекемеге бөлек жолданатын арыз-шағымдар бір платформада жинақталды.

Азамат өтінішінің қай мекемеге, нақты қай маманға түскенін, оның қалай қаралып жатқанын онлайн бақылай алады. Жауаппен келіспесе, шешімге сол жерде-ақ шағым түсіруге мүмкіндік бар. Осылайша азамат пен мемлекеттік орган арасындағы хат алмасу ашық әрі біртұтас диалог алаңына айналды.

Халықаралық ынтымақтастық және ұлттық мәдениетті таныту

Халықаралық ынтымақтастық және ұлттық мәдениетті таныту

Кейінгі жеті жылда Қазақстан мәдениеті әлемнің түрлі елдерінде кеңінен таныстырылды. Отандық өнерпаздар халықаралық фестивальдер, көрмелер мен байқауларға қатысып, мәдениет күндері елдер арасындағы мәдени байланысты нығайта түсті.
Қазақстанның мәдениет күндері 15 елде өтті. Тек 2023 жылдың өзінде мұндай іс-шаралар Өзбекстан және Әзербайжанда өткізілді. Каирде Сұлтан Бейбарыстың 800 жылдығына арналған іс-шаралар ұйымдастырылып, әз-Заһир Бейбарыс мешіті ашылды. Кейінгі жылдары Түрікменстан және басқа да мемлекеттермен мәдени алмасу жалғасты.

2025 жылы Бейжіңде Қазақстанның мәдени орталығы ашылды. Ол ұлттық өнер мен дәстүрді тұрақты түрде насихаттайтын мәдени алаңға айналды. Сол жылы Ақтау қаласы Түркі әлемінің мәдени астанасы мәртебесін иеленді.

ЮНЕСКО-мен ынтымақтастыққа да айрықша мән беріліп келеді. Салалық деректерге сәйкес, Қазақстанның 15 тарихи-мәдени ескерткішін қамтитын төрт номинация ЮНЕСКО-ның Бүкіләлемдік мұралар тізіміне енген. Олардың қатарында Қожа Ахмет Ясауи кесенесі мен Таңбалы петроглифтері бар. Сондай-ақ 2026 жылы Маңғыстау түбегіндегі жерасты мешіттері тізімге енгізілгені көрсетілген.

ЮНЕСКО-ның материалдық емес мәдени мұрасының репрезентативтік тізіміне қазақ мәдениетінің 14 элементі енгізілген. Олардың қатарында домбырамен күй тарту өнері, киіз үй жасау дәстүрі, айтыс және «Беташар» салты бар. 2026 жылы ЮНЕСКО-ның мәдени мұрасын ілгерілету жөніндегі 2026-2028 жылдарға арналған кешенді жоспар бекітілді.

Қазақ мәдениетінің көрнекті тұлғаларының мерейтойлары да халықаралық деңгейде аталып келеді. Роза Бағланова, Бердібек Соқпақбаев, Нұрғиса Тілендиев, Абдолла Қарсақбаев және Ермек Серкебаевтың мерейтойларына арналған іс-шаралар ЮНЕСКО-ның атаулы күндер күнтізбесіне енгізілді.

Қазақстандық өнерпаздар Еуропа мен Азиядағы халықаралық байқауларда да жоғары нәтиже көрсетті. Димаш Құдайберген Нью-Йорктегі Madison Square Garden сахнасында өнер көрсетсе, Данэлия Төлешова America’s Got Talent финалына шықты. Ал Қарақат Башанова Junior Eurovision 2020 байқауында екінші орын иеленді.

Руслан Талас Венада өткен WorldVision халықаралық байқауында I орын иеленді, ал 2024 жылы Штутгарт қаласында Guadagnini Foundation II халықаралық скрипкашылар байқауында II орын алды.

Әлім Бейсембаев Веймардағы Ф.Лист атындағы халықаралық жасөспірімдер байқауы мен Манчестердегі халықаралық пианистер байқауының лауреаты атанды. Сондай-ақ Ван Клиберн атындағы I халықаралық жас пианистер байқауында үздік нәтиже көрсетіп, 2021 жылы Лидсте өткен XX халықаралық пианистер байқауында Уотерман алтын медалін иеленді.

2024 жылы Сағадат Омарғазин Аустрияда өткен Бетховен атындағы XIX халықаралық скрипкашылар байқауында жеңімпаз атанды.

Жандос Сауыт пен Scythians триосы аккордеоншылар арасындағы 79-шы Coupe Mondiale халықаралық байқауында жеңіске жетті.

🔹Отандық киноның дамуы

Кейінгі жеті жылда отандық кино өнерінде де айтарлықтай нәтижелерге қол жеткізілді. 2019-2025 жылдары мемлекеттік қолдаумен 150 киножоба қолға алынып, оның 124-і аяқталды. 2019 жылы қабылданған «Кинематография туралы» заң саланы жүйелі дамытуға негіз болды.

Отандық фильмдердің прокаттағы үлесі де артты. 2024 жылы экранға 94 қазақстандық фильм шықса, 2025 жылы олардың саны 103-ке жетті. 2025 жылы отандық фильмдердің жалпы кассалық түсімі шамамен 30 млрд теңгені құрады.

Қазақстандық фильмдер халықаралық фестивальдерде жоғары бағаланды. «Ақын», «Схема» және «Адемоканың оқуы» фильмдері Токио, Берлин және Варшавадағы халықаралық кинофестивальдерде жүлде алды. Тек 2024 жылдың өзінде жеті отандық фильм 34 халықаралық жүлдеге ие болды. Ал «Бауырына салу» фильмі Қазақстан атынан «Оскар» сыйлығына ұсынылды.

Дүниежүзілік зияткерлік меншік ұйымының Global Innovation Index – 2024 дерегіне сәйкес, Қазақстан «Ұлттық көркем фильмдер» көрсеткіші бойынша 61-орыннан 31-орынға көтеріліп, Азиядағы үздік үш елдің қатарына енді.

Отандық фильмдер әлемнің көптеген елінде көрсетіле бастады. Қазақстан киносы күндері 30-дан астам елде өтті.

312 жаңа мәдениет нысаны: Қазақстанның мәдениет саласындағы жеті жылдағы өзгерістер

312 жаңа мәдениет нысаны: Қазақстанның мәдениет саласындағы жеті жылдағы өзгерістер

Кейінгі жеті жылда Мемлекет басшысы Қасым-Жомарт Тоқаевтың бастамасымен елімізде мәдениет саласын дамыту, ұлттық мұраны сақтау, отандық өнерді қолдау және мәдени инфрақұрылымды жаңғырту бағытында ауқымды жұмыстар атқарылды.

Осы кезеңде елімізде театрлар, музейлер, кітапханалар мен мәдениет үйлерін қоса алғанда, 312 жаңа мәдениет нысаны салынды. Сонымен қатар қолданыстағы нысандар жаңғыртылып, материалдық-техникалық база жаңартылды. Өңірлерде мәдени қызмет көрсету аясын кеңейтуге де басымдық берілді.

Кітапхана ісі мен шығармашылық білім беруді дамытуға айрықша көңіл бөлінді. Кітапханаларды 2027 жылға дейін жаңғырту жөніндегі Жол картасы іске асырылып, бүгінде өңірлердегі мәдениет үйлерінің материалдық-техникалық базасы жаңартылып жатыр. Алматыда шығармашылық оқу орындарының студенттеріне арналған 500 орындық жатақхананың құрылысы басталды. Петропавлда Қазақ ұлттық өнер университетінің өкілдігі ашылса, Шымкентте Мәдениет және өнер университетін құру жұмыстары қолға алынды.

🔹Театр өнерінің дамуы

Кейінгі жеті жылда театр өнерінде де бірқатар маңызды өзгеріс болды. Астана, Атырау, Қызылорда және Шымкент қалаларында бес жаңа мемлекеттік театр құрылды. Астанадағы Қалибек Қуанышбаев атындағы театр, Петропавлдағы Сәбит Мұқанов атындағы театр және Түркістан музыкалық драма театры жаңа ғимараттарға көшті.

Қазір Ақтөбе мен Қонаев қалаларында театрлардың құрылысы жүріп жатыр. Шымкент, Қызылорда және Семей қалаларында жаңа театр салу жобалары пысықталуда. Мұхтар Әуезов және Наталия Сац атындағы театрларды жаңғырту жұмыстары да қатар жүргізіліп келеді.

Жетекші мәдени ұйымдардың мәртебесін көтеруге маңызды қадам жасалды. Кейінгі алты жылда республикалық 10 мекемеге «Ұлттық», республикалық және өңірлік тағы 10 ұйымға «Академиялық» мәртебесі берілді. Сондай-ақ отыз жылға жуық уақыттан кейін «Қазақстанның халық әртісі» құрметті атағы қайта тағайындалды.

Отандық театрлардағы репертуар да жаңа туындылармен толықты. Театр сахналарында «Қозы Көрпеш – Баян Сұлу», «Алтын гүл», «Ақбала» балеттері, «Жошы хан» тарихи драмасы және «Қыпшақ қызы Аппақ» операсының премьералары өтті. Сонымен қатар «Гүлдер» ансамблі қайта құрылып, Мемлекеттік классикалық гитарашылар квинтеті мен көпұлтты «Бірлік» ансамблі құрылды.

🔹Музейлерді жаңғырту және мәдени мұраны сақтау

Музей ісінде де елеулі өзгерістер болды. Еліміздегі музейлер саны 36-ға артып, 250-ден 286-ға жетті. Музей қорлары 68 669 сақтау бірлігімен толықты.

Бес визит-орталықтың құрылысы аяқталып, пайдалануға берілді. Олар: Алматы облысындағы «Таңбалы», Түркістан облысындағы «Отырар», «Ордабасы», Ұлытау облысындағы «Ұлытау» және Атырау облысындағы «Сарайшық» визит-орталықтары.

Жаңа визит-орталықтарды дамыту жұмыстары да жалғасып жатыр. Олардың қатарында Түркістан облысындағы «Сауран», «Гауһар ана» және Алматы облысындағы «Есік» бар.
Екі музейде «Алтын Орда» залдары ашылды. Сондай-ақ Палеонтология залы мен Қолөнершілер орталығы жұмысын бастады.
Ірі жобалардың бірі – ашық аспан астындағы «Бозоқ» археологиялық паркі. Бұдан бөлек, Әбілхан Қастеев атындағы Мемлекеттік өнер музейіне күрделі жөндеу жұмысы жүргізілді.

Музей қорларын цифрландыру жұмыстары да жаңа қарқын алды. 2025 жылы еліміздегі 284 музей туралы мәліметті қамтитын E-museum платформасы іске қосылды. Цифрлық каталогқа 66 мыңнан астам музей жәдігері енгізіліп, 750 үшөлшемді модель мен 15 виртуал тур әзірленді.

Қазақстан музейлерінің шетелдік әріптестерімен байланысы да кеңейді. Отандық музей қорларындағы құнды жәдігерлер Ресей, Италия, Франция, Қытай және Әзербайжандағы көрмелерде көрсетілді. 2025 жылы Ә.Қастеев атындағы Ұлттық өнер музейінің туындылары Третьяков галереясында қойылса, ұлттық жобалар Венеция биенналесі мен Париждегі Гиме Азия өнері музейінде таныстырылды. 2026 жылы «Қазақстан – Франция 2026» халықаралық Қазақстан музей конгресі – музеология форумы өтті.

Заң жүзінде Түркістанның еліміздің рухани, тарихи-мәдени және туристік орталығы ретіндегі ерекше мәртебесі бекітілді.

Қазақстанда күріш өндірісі мен экспорты артты

Қазақстанда күріш өндірісі мен экспорты артты
2026 жылғы қаңтар-тамыз айларында Қазақстанда 145 мың тонна күріш өндірілді, бұл 2025 жылдың сәйкес кезеңімен салыстырғанда 18,6%-ға артық. 2025 жылғы қаңтар-тамыз айларында өндіріс көлемі 122,3 мың тоннаны құрады.

2026 жылғы қаңтар-шілде айларында күріштің ішкі нарықтағы өткізу көлемі 70,5 мың тоннаны құрап, 2025 жылдың сәйкес кезеңімен салыстырғанда 3,9%-ға артты.

2026 жылғы қаңтар-шілде айларында күріш экспорты 2025 жылдың сәйкес кезеңімен салыстырғанда 25,3%-ға өсті. Сыртқы нарықтарға жеткізу көлемі 70,9 мың тоннадан 88,8 мың тоннаға дейін артып, экспорт құны 24,7 млн АҚШ доллары деңгейінде сақталды. Негізгі экспорт бағыттары – Ауғанстан, Тәжікстан, Ресей, Өзбекстан және Қырғызстан.

Күріш экспортының көлемі 2026 жылғы қаңтар-шілде айларында импорт көлемінен 18 есе жоғары болды. 2026 жылғы қаңтар-шілде айларында күріш импорты 2025 жылдың сәйкес кезеңімен салыстырғанда 70,7%-ға төмендеді. Импорттық жеткізілімдер көлемі 16,7 мың тоннадан 4,9 мың тоннаға дейін, ал құны 9,0 млн АҚШ долларынан 3,3 млн АҚШ долларына дейін қысқарды. Негізгі жеткізуші елдер қатарында Үндістан, Ресей, Пәкістан, Таиланд және Өзбекстан.

https://stat.gov.kz/news/aza-standa-k-rish-ndirisi-men-eksporty-artty

«Әділет» партиясы фракциясының депутаттық сауалы Қазақстан Республикасының Бас Прокурорына, Ішкі істер министріне, Ғылым және жоғары білім министріне, Оқу-ағарту министріне және Қаржылық мониторинг агенттігіне жолданады.

«Әділет» партиясы фракциясының депутаттық сауалы Қазақстан Республикасының Бас Прокурорына, Ішкі істер министріне, Ғылым және жоғары білім министріне, Оқу-ағарту министріне және Қаржылық мониторинг агенттігіне жолданады.

Жастардың синтетикалық есірткі тасымалы мен дропперлікке тартылуының алдын алу және ведомствоаралық үйлестіруді күшейту туралы

«Әділет» партиясының бағдарламасында «Заң мен тәртіп» негізгі басымдық ретінде белгіленген. Осы ұстаным аясында фракциямыз жастардың есірткі қылмыстарына тартылуының алдын алуға ерекше назар аударады. Алайда жастарды синтетикалық есірткі тасымалына және банк шоттары арқылы заңсыз қаржы айналымына тарту қоғамдық қауіпсіздікке елеулі қатер төндіріп отыр.
ҚР Бас прокуратураның Құқықтық статистика деректеріне сәйкес, елімізде 2025 жылы 8 280 есірткі қылмысы тіркеліп, 4 684 адам қылмыстық жауаптылыққа тартылса, 67 жасөспірім сотталған, ал 2026 жылдың тоғыз айында 7 464 есірткі қылмысы тіркеліп, 3 282 адам қылмыстық жауаптылыққа тартылып, 59 жасөспірім сотталған.
Осылайша, биылғы тоғыз айда сотталған кәмелетке толмағандардың саны өткен жылдың толық көрсеткішінің 88 пайызына жетті. Бұл деректер профилактикалық жұмысты күшейтіп, балалар мен жасөспірімдерді есірткінің заңсыз айналымына тартудан қорғау қажеттігін көрсетеді.
Сонымен қатар, жастарды заңсыз әрекеттерге тартудың тағы бір өзекті бағыты – дропперлік. Құқықтық статистика деректеріне сәйкес, 2026 жылғы маусымның басына қарай дропперлікке қатысты өндірісі аяқталған істерде күдікті ретінде өткен 214 адамның 159-ы – 18 бен 29 жас аралығындағы азаматтар. Оның ішінде 140 адам құқық бұзушылық жасалған кезде жұмыссыз болған. Бұл қылмыстың алдын алу шараларын жастарды жұмыспен қамту және әлеуметтік қолдаумен қатар жүргізу қажеттігін көрсетеді.
Қаржылық мониторинг агенттігінің 2026 жылғы 8 шілдедегі ақпаратына сәйкес, жыл басынан бері қылмыстық кірістерді жылыстатумен айналысқан 33 дропперлік топтың қызметі тоқтатылған. Олардың банктік шоттары арқылы 112 миллиард теңгеден астам заңсыз қаржылық операция жүргізілген.
Құқық қорғау органдарының жұмысын бағалай отырып, мәселені тек қылмыстық қудалаумен шешу мүмкін еместігін атап өтеміз. Қаржылық бақылау, қылмысқа қарсы іс-қимыл және жастарды әлеуметтік қолдау шаралары өзара үйлесуі тиіс. Алайда ведомствоаралық үйлестіру жеткіліксіз.
Оқу жылының басында білім алушыларды ақшалай сыйақымен қызықтырып, банк шоттарын ашуға және өзге адамдардың пайдалануына беруге тарту алаңдатады. Жеңіл табысқа сеніп, шотын «жалға берген» жастар оның заңсыз қаржы айналымына пайдаланылу қаупін және өз жауапкершілігін жете түсіне бермейді.
Оқу орындарындағы профилактикалық жұмыста да олқылықтар бар. Бірінші курс студенттерімен түсіндіру жұмыстары, құқық қорғау органдарының тәрбие ісіне жауапты қызметкерлермен және психологтармен байланысы жүйелі жолға қойылмаған. Ақпаратты жастарға түсінікті тілде жеткізу тәсілдерін жаңарту қажет. Есірткі мессенджерлер мен QR-кодтар арқылы таралып жатқанда, профилактиканы граффити өшірумен шектеу жеткіліксіз.
Осыған байланысты «Әділет» партиясының фракциясы мынадай шараларды ұсынады.
Біріншіден, оқу жылының алғашқы 15 күнінде бірінші курс студенттеріне есірткі қылмыстары мен банк шоттарын өзге адамдарға берудің қаупін түсіндіруді жүйелі ұйымдастыру қажет. Құқық қорғау органдарының оқу орындары қызметкерлерімен және психологтарымен тұрақты бірлескен жұмысын жолға қойып, профилактикаға қатысатын мамандарды жастармен жұмыс істеуге арнайы даярлау керек.
Екіншіден, жастардың банк карталары мен шоттарын заңсыз пайдаланудан қорғауды күшейту қажет. 14 пен 22 жас аралығындағы азаматтардың 50 мың теңгеден асатын тұлғааралық аударымдарына қосымша биометриялық растау енгізу мүмкіндігін қарастыруды ұсынамыз. Студенттерді шоттарын сыйақыға беруге тарту мен күмәнді операцияларды ерте анықтау үшін банктер, құқық қорғау органдары және оқу орындары арасында жедел ақпарат алмасуды жолға қойып, тиісті міндеттерін орындамаған банктердің жауапкершілігін қарастыру керек.
Үшіншіден, «Отбасының цифрлық картасы» арқылы әлеуметтік осал жастардың қажеттіліктерін анықтап, атаулы көмек көрсету қажет. Оның ішінде мұқтаж колледж студенттерін тегін тамақпен және киімге арналған ваучерлермен қамтуды, коммуналдық кәсіпорындар базасында еңбек заңнамасына сай күнделікті ақы төленетін қысқа мерзімді жұмыс орындарын ұйымдастыруды қарастыру маңызды.
Төртіншіден, құқық қорғау органдары мен қаржы, цифрландыру, еңбек және білім салаларының тұрақты ведомствоаралық үйлестіру тетігін күшейту қажет. Әр органның міндеті, ақпарат алмасу тәртібі, орындау мерзімі және ортақ нәтиже көрсеткіштері белгіленуге тиіс. Бұл тетік қылмыстық схемаларды анықтауды, заңсыз қаржы ағынын тоқтатуды және тәуекел тобындағы жастарға көмек көрсетуді өзара байланыстыруы керек.
Жастарға заңды табыс табуға мүмкіндік беру және уақтылы әлеуметтік қолдау көрсету — оларды қылмыстық ортадан қорғаудың маңызды шарты. Осы ұсыныстар бойынша қабылданатын нақты шаралар, жауапты органдар және орындау мерзімдері туралы заңда белгіленген мерзімде жауап беруді сұраймыз.

Құрметпен, «Әділет» Фракциясының мүшесі Д.Ділдәбек

Дидарбек Ділдәбек: Жастарды есірткі тасымалдаудан арашалауымыз керек

Дидарбек Ділдәбек: Жастарды есірткі тасымалдаудан арашалауымыз керек

«Әділет» партиясы фракциясының мүшесі Дидарбек Ділдәбектің Бас прокурор Берік Асыловқа, Ішкі істер министрі Ержан Сәденовке, Ғылым және жоғары білім министрі Саясат Нұрбекке, Оқу-ағарту министрі Жұлдыз Сүлейменоваға, Қаржылық мониторинг агенттігінің төрағасы Жанат Элимановқа жастарды синтетикалық есірткі тасымалынан, заңсыз қаржы айналымынан арашалауға қатысты жолдаған депутаттық сауалы.

t.me/quryltairesmi

«Әділет» партиясы Фракциясының депутаттық сауалы Қазақстан Республикасының Оқу-ағарту министрі

«Әділет» партиясы Фракциясының депутаттық сауалы Қазақстан Республикасының Оқу-ағарту министрі
Ж.Д. Сүлейменоваға, Ғылым және жоғары білім министрі С.Нұрбекке жолданады.

Мемлекет басшысының бастамаларын іске асыру жөніндегі шаралар туралы.

Құрметті Жұлдыз Досбергенқызы!
Құрметті Саясат Нұрбекұлы!
Қазақстанда Президент Қасым-Жомарт Тоқаевтың бастамасымен бүкіл халық болып қабылдаған Еліміздің Жаңа Конституциясына сәйкес түбегейлі жаңа мемлекет институттарын қалыптастыру процессі мәресіне жетті.
Жаңа Конституцияның қабылдануымен біз Еліміздің саяси тарихында маңызы орасан зор саяси реформация кезеңін бастан өткердік!
Еліміз бір саяси дәуірден, прогрессивті дәрежесі жоғары саяси кезеңге аяқ басты!
Қазақстанда «күшті Президент — ықпалды Парламент — есеп беретін Үкімет» моделі заңдық тұрғыдан бекітілді.
Мемлекеттің тұрақтылығы мен үйлесімін сақтау үшін Вице-Президент лауазымы енгізілді.
Мемлекеттік басқару тиімділігін арттыру мақсатында бір палаталы Парламент Құрылтай өз жұмысын бастады.
Құрылтайда қабылданатын заңдар Мемлекет басшысының халқымыздың әл-ауқатын арттырып, әділетті Қазақстан құру міндетіне сәйкес атқаруға жігерлі кірісті!
Билік пен қоғам арасындағы конструктивті диалогты нығайту мақсатында Қазақстан Халық Кеңесі құрылды
Бұл реформалардың басты мақсаты — Қазақстанда болашақ сын-қатерлерге жауап беруге қабілетті мемлекет, тұрақтылық пен плюрализм принциптеріне негізделген саяси жүйе қалыптастыру.
Сонымен қатар, Президент Тоқаев мемлекет пен қоғам арасында байланысты күшейтіп, халқымыздың дәстүрлі рухани тамырымын тереңдету мақсатында «Адал Азамат», «Заң мен Тәртіп», «Таза Қазақстан» концепцияларын
ұсынып отыр.
Бұл Концепцияларды Ел мен Жерді, Қазақстанның Тұтастығы мен тұрақтылығын сақтау мақсатында халқымыздың саяси мәдениетін арттырып, қоғамның гармониясын сақтауға бағытталған заманауи Моральдық Кодекс деуге болады.
«Әділет» Фракциясы Мемлекет басшысы Тоқаевтың прогрессивті саяси реформаларын нық бекіту үшін мемлекеттік құзырлы органдар келесі қадамдар жасауы қажет деп есептейді!

  1. Мемлекет басшысының тапсырмасына сәйкес, Еліміздің жаңа Конституциясының новеллалары мен нормаларын халық арасында жүйелі түсіндіру.
  2. Мемлекет берік болуы үшін мемлекет пен қоғам Конституция құндылықтарын сыйлап, оны бұлжытпай орындайтын дәрежеге жетуі керек!
    Сондықтан, Жаңа Конституция құндылықтарын жеткіншек ұрпаққа да, ересектерге де толыққанды насихаттаудың ұтымды, заманауй бағыттарын кешенді түрде ойластыру өзекті.
  3. «Адал Азамат», «Заң мен Тәртіп», «Таза Қазақстан» концепцияларының бір реттік акция емес, қоғамның дамуы, азаматтармен мемлекет қарым-қатынасының жаңа келбетіне бастайтын терең философиялық бағыт екендігін айқындау.
    Осы негізде, мектеп, жоғарғы оқу орындарында, аталған концепциялардың маңызы жөніндегі тақырыптық сағаттар өткізу, әдістемелік курстар ұйымдастыру, аталған концепцияларды насихаттап, іс-жүзіне асырудың жүйесін жасау маңызды.
    Мемлекет басшысының еліміздің саяси жүйесін реформациялаудағы басты мақсаты халықаралық құқық девальвацияға ұшырап, жаһандық тұрақсыздық жайлаған кезеңде Қазақстанда Елдікті сақтап, Тәуелсіздікті Мәңгі ету!
    Баршамыз осы міндет биігінен шыға білуіміз қажет!

Құрметпен, «Әділет» Фракциясы мүшелері

« Older posts Newer posts »

© 2026 ЗЕРЕН

Theme by Anders Noren — Up ↑