- Қазақстанда әлеуметтік маңызы бар тауарлардың бірқатары бойынша бағаның төмендеуі жалғасуда 2026 жылғы 23 қыркүйектегі жағдай бойынша есепті аптада Қазақстанда әлеуметтік маңызы бар азық-түлік тауарларының бірқатарының бағасы төмендеді.
Апта ішінде пияздың бағасы 4,3%-ға, сәбіздің – 2,8%-ға, алманың – 2,5%-ға, қиярдың – 1,3%-ға, картоптың – 0,9%-ға, қант пен тауық етінің бағасы 0,5%-ға, сүйекті сиыр етінің бағасы 0,4%-ға төмендеді.
Есепті аптада қой етінің, тауықтың, сүзбенің және қырыққабаттың бағалары өзгеріссіз қалды.
Өңірлер бөлінісінде еліміздің бірқатар қаласында дефляциялық динамика байқалды. Әлеуметтік маңызы бар азық-түлік тауарлары бағасының жалпы деңгейі бір апта ішінде Қарағандыда 0,4%-ға, Ақтөбе мен Жезқазғанда – 0,2%-ға, Түркістанда – 0,1%-ға төмендеді.
Астана, Алматы, Көкшетау, Шымкент, Қонаев, Павлодар және Семей қалаларында бағалар алдыңғы апта деңгейінде сақталды.
Республика бойынша пияздың орташа бағасы килограмына 142 теңгені құрады, бұл ретте ең төмен баға Талдықорған қаласында – килограмына 107 теңге тіркелді.
Ел бойынша сәбіздің орташа бағасы килограмына 215 теңгені құрады, бұл ретте ең төмен баға Павлодар қаласында – килограмына 140 теңге тіркелді.
Республика бойынша алманың орташа бағасы килограмына 727 теңгені құрады. Ең төмен бағалар Шымкент қаласында – килограмына 554 теңге деңгейінде тіркелді.
Қызанақтың республика бойынша орташа бағасы килограмына 668 теңгені құрады. Ең төмен бағалар Тараз қаласында – 412 теңге және Түркістан қаласында – 416 теңге деңгейінде тіркелді.
Әлеуметтік маңызы бар азық-түлік тауарлары бағалары индексінің көрсеткіші апта сайын есептеледі. Бағаларды бақылау барлық облыс орталықтарында, республикалық маңызы бар қалаларда және астанада жүргізіледі. Әлеуметтік маңызы бар азық-түлік тауарлары бағасының динамикадағы өзгерістерін Қазақстан Республикасы Стратегиялық жоспарлау және реформалар агенттігі Ұлттық статистика бюросының сайтынан және «Талдау» ақпараттық-талдау жүйесінен көруге болады.
*Әлеуметтік маңызы бар азық-түлік тауарларының тізбесі Қазақстан Республикасы Сауда және интеграция министрінің 2025 жылғы 23 желтоқсандағы №362-НҚ бұйрығымен бекітілген және 31 атаудағы азық-түлік өнімдерін қамтиды.
